Наманган вилоятидаги туманлардан бирининг мактаб ва мактабгача таълим бўлими раҳбари пора билан қўлга тушди. Бу ҳақда Давлат хавфсизлик хизмати томонидан расман маълумот берилди.
Маълум қилинишича, бўлим мудири ва икки хусусий боғча раҳбарлари биргаликда тил бириктириб, маҳаллий фуқаронинг ишончига киришган. Улар ўз мансабдор танишлари орқали ушбу фуқарони бошқа тумандаги давлат тасарруфидаги мактабгача таълим муассасаларидан бирининг мудира лавозимига тайинлаш эвазига 2500 АҚШ доллари талаб қилишган.
Тезкор тадбир давомида дастлаб оилавий нодавлат мактабгача таълим муассасасидан бирининг раҳбари 2500 АҚШ долларини олган вақтида ушланди. Кейинчалик тадбир давом эттирилди ва иккинчи оилавий нодавлат боғча раҳбари ҳам шу пул маблағини олган пайтда қўлга олинди.
Сўнгра аниқландики, мазкур маблағни 1000 АҚШ доллари миқдорида туман мактаб ва мактабгача таълим бўлими мудирига топшириши лозим эди. Шу тариқа, мазкур мансабдор шахс ҳам ушбу пулни олаётган пайтда ашёвий далиллар билан ушланди.
Билдирилишича, ҳозирда уларга нисбатан Жиноят кодексининг 168-моддаси (Фирибгарлик) 3-қисми “а” банди ва 211-моддаси (Пора бериш) 1-қисми билан жиноят иши қўзғатилган ва тергов ҳаракатлари изчил олиб борилмоқда.
Шу билан бирга, Кадастр агентлиги Давлат кадастрлар палатасининг Андижон вилоятидаги туманлардан бирининг филиали раҳбари ҳам хизмат мавқеидан фойдаланиб, фуқаронинг ишончига кирди. У 17 сотих тошлоқ ер майдонини нотурар жой сифатида унинг номига расмийлаштириш эвазига 4000 АҚШ доллари олган пайтда ашёвий далиллар билан ушланди. Бу ҳолат юзасидан унга нисбатан Жиноят кодексининг 210-моддаси (Пора олиш) 2-қисми “в” банди билан жиноят иши қўзғатилган ва қамоқ чораси қўлланган.
«Замин»ни Telegram’да ўқинг!
