Экология, атроф-муҳитни муҳофаза қилиш ва иқлим ўзгариши вазирлиги маълум қилишича, пойтахтда 20 кун давомида атмосферага белгиланган меъёрдан ортиқ зарарли моддалар чиқараётган 367 та автомобиль аниқланган.
Маълумотларга кўра, жорий йилнинг 10 сентябридан бугунга қадар Тошкент шаҳрида жами 26 900 та автотранспорт воситалари махсус текширувдан ўтказилган.
Текширув жараёнида шаҳардаги 367 та транспорт воситаси меъёрдан анча юқори даражада зарарли чиқиндилар ҳавога тарқатаётгани қайд этилди. Шу сабабли, мазкур воситалар ҳайдовчиларига нисбатан давлат стандартларини қўпол равишда бузганлик учун маъмурий жазо чоралари қўлланди.
Экология идорасига кўра, пойтахтда “Тоза ҳаво” ойлигининг иккинчи босқичи ҳозирги кунда фаол равишда олиб борилмоқда ва у 10 октябргача давом этади.
Эслатиб ўтамиз, шунингдек, Навоий вилоятида ҳам атроф муҳитни ифлослантираётган 20 дан зиёд ишлаб чиқариш корхоналари фаолияти вақтинча тўхтатилгани ҳақида аввалроқ маълум қилинган эди.
Мутаҳассислар фикрича, бундай чоралар аҳоли саломатлигини муҳофаза қилиш ва шаҳар ҳавосини соф сақлаш учун зарур ва ўз вақтида қўлланилган қадам сифатида аҳамиятга эга.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
