Сўнгги кунларда ижтимоий тармоқларда айрим олий таълим муассасалари талабаларига стипендиялар ўз вақтида берилаётмагани ҳақида турли хабарлар тарқалди. Бу хабарлар кўплаб талабалар ва уларнинг ота-оналари орасида саволлар ва ташвишларга сабаб бўлди.
Олий таълим, фан ва инновациялар вазирлиги бу ҳолат юзасидан расмий изоҳ берди, деб хабар берди расмий манбалар. Вазирлик маълумотларига кўра, ҳозирги вақтда барча олийгоҳларда юқори курс талабалари стипендияларини ўз вақтида қабул қилишган.
Шу билан бирга, тарқалган хабарлар асосан айрим олий таълим муассасалари — жумладан, Ўзбекистон Миллий университети, Санъат ва маданият институти, Тошкент давлат аграр университети ҳамда Самарқанд давлат тиббиёт университетининг биринчи босқич талабалари билан боғлиқ экани таъкидланди.
Маълум қилинишича, мазкур талабаларга стипендия тайинлаш бўйича тегишли буйруқларни расмийлаштириш ҳамда банк карталарини очиш жараёни бироз кечиккан. Шу сабабли тўловлар вақтинча амалга оширилмаган.
Вазирлик бу жараён ҳозирда тўлиқ якунланиш арафасида эканини маълум қилди. «Барча зарур ҳужжатлар расмийлаштирилмоқда ва стипендиялар жорий ҳафта якунига қадар барча олий таълим муассасалари талабаларига тўлиқ тўлаб берилади», — дея таъкидлади ташкилот вакиллари.
Шунингдек, идора талабалардан сабр ва тушуниш билан ёндашишни сўради ҳамда бундай кечикишлар техник ва ҳужжат айланиши жараёни билан боғлиқлигини қўшимча қилди.
Вазирлик сўнгги пайтларда таълим тизимида рақамли тўлов тизимларини яхшилаш ва бюрократик кечикишларни қисқартириш бўйича ишлар олиб борилаётганини ҳам таъкидлади. Яъни келгуси ойларда бу каби ҳолатлар такрорланмаслиги учун янги автоматлаштирилган тизим жорий этилиши кутилмоқда.
“Zamin”ни Telegram'да ўқинг!
