Тошкент шаҳри Бектемир туманида жойлашган 290-мактаб ҳудудида 4 октябрь куни соат 16:20 атрофида икки ўқувчи ўртасида жанжал содир бўлди, деб UPL.uz хабар берди.
Маълумотга кўра, 9-синфда ўқиётган, 2010 йилда туғилган 15 ёшли ўқувчи ва 3-синфда ўқиётган, 2016 йилда туғилган 9 ёшли бола оғзаки тортишувга киришган. Тортишув чоғида катта ёшли ўқувчи велосипедга зарба берган. Велосипедда ҳаракатланаётган бола йиқилиб, юзига жиддий шикаст етказган.
Суд-тиббий экспертизага кўра, боланинг ўнг лаби жароҳатланган, иккинчи тиш тўлиқ, биринчи тиш эса қисман чиқиб кетган. Шунингдек, пешонаси, чап юзи, елкаси ва қўлларида уриб олиш ва тўқималар жароҳати аниқланган. Шикастлар енгил деб баҳоланган.
Ҳозирда Бектемир туман ИИБ ходимлари томонидан текширув ишлари олиб борилмоқда. 15 ёшли боланинг онасига нисбатан Ўзбекистон Республикаси Маъмурий жавобгарлик тўғрисидаги кодекснинг болаларни тарбиялаш бўйича мажбуриятларни бажармаслик моддаси бўйича баённома тузилган.
Шунингдек, мактаб маъмурияти ва болаларнинг ота-оналари билан профилактика суҳбатлари ўтказилиб, бундай ҳолатларни олдини олиш чоралари белгиланган.
“Zamin”ни Telegram'да ўқинг!
