Қашқадарё вилоятининг Ғузор туманида қотиллик содир бўлди. Маълумотларга кўра, ўзга хонадонга ўғриликка тушган фуқаро 61 ёшли аёлни шафқатсизларча ўлдирган.
Воқеа 2025 йил 25 май куни кечқурун рўй берган. Тергов маълумотларига кўра, марҳуманинг келини уйдаги йиллар давомида йиғилган катта маблағни қўлга киритишни режалаштирган. 61 ёшли кекса аёлнинг уйда ёлғиз қолишидан фойдаланган келин бу ишга ўзининг яқинлари ва шерикларини ҳам жалб этган.
Келиннинг ёрдамчилари уйни талон-торож қилиш мақсадида ҳаракатга тушишган. Улардан бири — 32 ёшли эркак келин томонидан берилган режага кўра, уйни электр токидан узиб, кузатув камераларини ўчирган. Бу билан ҳеч ким ҳодисани ёзиб олмаслиги таъминланган.
Шундан сўнг у уйга кириб, пулларни излай бошлаган ва 61 ёшли аёлга тўсатдан дуч келган. Жиноятчи у билан тортишиб қолган ва изидан аёлни бўғиб ўлдирган. Даҳшатли қотилликдан сўнг у уйдаги катта маблағни топиб, ўз шериклари билан бирга хонадонни ёқиб юборган.
Ҳозирда мазкур иш бўйича 4 нафар шахс — келин, унинг синглиси ва 31 ҳамда 32 ёшли икки эркак қамоққа олинган. Тергов натижаларига кўра, уларнинг барчаси жиноятни олдиндан келишиб, режа асосида амалга оширган.
Айни пайтда иш жиноят ишлари бўйича Ғузор туман судида кўриб чиқилмоқда. Суд жараёнида гумондорлар қилмишини тан олишдан бош тортмаётгани айтилмоқда.
Маҳаллий аҳоли бу воқеадан қаттиқ ларзага тушган. Улар марҳуманинг қишлоқда меҳрибон ва инсофли инсон сифатида танилганини таъкидламоқда.
Бу ҳодиса яна бир бор одамийликдан узоқ, мол-дунё иллати ортидан қадам қўйганлар қанчалик оғир оқибатларга олиб келиши мумкинлигини кўрсатди. Тергов органлари эса бу иш бўйича қатъий жазо чоралари қўлланилишини маълум қилган.
“Zamin”ни Telegram'да ўқинг!
