Тошкентда Gentra ҳайдовчиси ЙПХ инспекторини судраб кетди

Тошкентнинг Яшнобод туманида Gentra ҳайдовчиси ЙПХ инспекторини автомашина капотида судраб кетди. Бу ҳақда шаҳар Ички ишлар бошқармаси хабар берди.

Маълумотларга кўра, воқеа Фарғона йўли кўчасида юз берган. Инспектор ҳайдовчини тўхтатган пайтда у буйруққа бўйсунмасдан ҳаракатни давом эттирган ва ходимни капотда судраб бир неча метрга олиб кетган.

Ҳайдовчи тез орада ушланган. Унга нисбатан Жиноят кодексининг 219-моддаси — “Ҳокимият вакилига қаршилик кўрсатиш” — бўйича жиноят иши қўзғатилган.

Жабрланган инспектор шифокорлар назоратида, аҳволи барқарор. Тергов ҳаракатлари давом этмоқда.