Тошкент вилоятида жамоатчиликни ташвишга солган нохуш воқеа содир бўлди. Қамчиқ давомидан тарқалган видеоларда милтиқ кўтарган эркак дўкон ичига бостириб кириб, сотувчи аёлни жароҳатлагани акс этгач, ижтимоий тармоқлар кескин баҳс ва муҳокама майдонига айланди. Кадрларда эркакнинг қўлида ов қуроли билан дўконга кириб, бақириб-чағириб вазиятни кескинлаштиргани, сўнгра сотувчига зарба бергани яққол кўринади.
Тошкент вилояти Ички ишлар бош бошқармаси маълумотларига кўра, воқеа 22 октябрь куни «Кўксарой» маҳалласида содир бўлган. Маълум қилишларича, 33 ёшли R.Q. ўзининг шаръий никоҳдаги турмуш ўртоғи — 35 ёшли N.Sh. билан ўзаро келишмовчилик ва жанжал туфайли дўконга келган ва аёлга таҳдид қилиб, тан жароҳати етказган.
Ҳодиса расман қайд этилгани ортидан вазиятга ҳуқуқни муҳофаза қилувчи органлар дарҳол аралашди. Жиноят кодексининг 109-моддаси 2-қисми бўйича жиноят иши қўзғатилди. Гумонланувчи тергов жараёнига жалб қилинган, унинг ТОЗ-34 туридаги ов қуроли мусодара қилинган ва овчилик гувоҳномаси расман бекор қилинди.
Суд-тиббий экспертиза хулосасига кўра, жабрланувчи аёл енгил тан жароҳати олган. Аҳволи барқарор, унга тиббий ёрдам кўрсатилган.
Ҳозирда воқеа тўлиқ назорат остида. Тошкент вилояти ИИББ ва Оҳангарон тумани ИИБ тергов ҳаракатларини давом эттирмоқда. Мутасаддилар томонидан воқеанинг сабаблари, қуролнинг қачон ва қандай шароитда ишлатилгани, шунингдек, келиб чиқиш омиллари атрофлича ўрганилмоқда.
Мутахассислар бундай ҳолатлар жамоат хавфсизлигига жиддий таҳдид эканини таъкидлаб, қуролдан норасмий ва назоратсиз фойдаланишнинг оқибатлари яна бир бор жамоатчиликка кўрсатилганини айтишмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
