Сирдарё вилоятининг Ховос туманида эрига тан жароҳати етказган аёл устидан жиноят иши кўриб чиқилиб, суд ҳукми эълон қилинди.
Маълумотларга қараганда, воқеа эркакнинг кечаси маст ҳолатда уйга қайтгани ва оила аъзоларига нисбатан тажовузкор ҳаракатлар қила бошлагани билан кескинлашган. Аёлнинг айтишича, ўша кунги жанжал пайтида эр аввал уни, кейин эса фарзандларини ҳақорат қилиб, калтаклаган. 10-синфда ўқиётган ўғлининг дўппосланаётганини кўрган она қўрқув ва ҳимоя инстинкти остида пичоқни қўлига олганини билдирган.
Гувоҳлар кўрсатмасига кўра, эркак уйга кириши билан барчага босим ўтказган, эҳтирос авжида эса ўғлини ҳам уришни бошлаган. Шунда аёл ўз фарзандини ҳимоя қилиш мақсадида жаҳл устида ошхона пичоғи билан эрининг қорин қисмига зарба берган.
Тиббий экспертиза хулосасига кўра, етказилган жароҳат ҳаёт учун хавфли деб баҳоланган. Суд жараёнида жабрланувчи эркак ҳозирда аёли билан ярашганини, ўша кунги хатти-ҳаракатларини мастликдан содир этганини айтган ва даъвоси йўқлигини билдирган.
Суд аёлнинг қилмишини Жиноят кодексининг 126-1-моддаси (оилавий-маиший зўравонлик) еттинчи қисми бўйича оғир жиноят сифатида баҳолаган. Шунга қарамай, тарафлар ярашгани ва жабрланувчининг даъвосизлиги инобатга олиниб, тайинланган озодликдан маҳрум қилиш жазоси шартли деб топилган ва бир ярим йиллик синов муддати белгиланган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
