Тошкент шаҳрида адвокатлик фаолияти билан шуғулланиб келган, олдин судланган шахс навбатдаги жиноят устида қўлга олинди. Бу ҳақда Давлат хавфсизлик хизмати расмий маълумот берди.
Маълум қилинишича, адвокат ўз таниш-мансабдорлари орқали жиноят иши доирасида гумонланувчига нисбатан “қамоқ” эҳтиёт чорасини қўлламасликни ҳал қилиб беришни ваъда қилган. Бу “хизмат” эвазига у 2 минг АҚШ доллари талаб қилган.
Ўтказилган тезкор тадбир давомида мазкур адвокат ушбу маблағни фирибгарлик йўли билан олаётган вақтда ашёвий далиллар билан ушланган. Аниқланишича, гап Шайхонтоҳур туман ИИО ФМБ Тергов бўлими иш юритувида бўлган, Жиноят кодексининг 168-моддаси — фирибгарлик билан боғлиқ жиноят иши ҳақида кетган.
Ҳозирда ушланган шахсга нисбатан Жиноят кодексининг 168-моддаси 3-қисми “в” банди ҳамда 28,211-моддаси 1-қисми билан жиноят иши қўзғатилган. Суд қарори билан унга нисбатан “қамоқ” эҳтиёт чораси қўлланган. Тергов ҳаракатлари давом этмоқда.
Қайд этилишича, бу сўнгги пайтларда адвокатлар иштирокида аниқланган ягона ҳолат эмас. Илгари ҳам Тошкент, Самарқанд ва Гулистон шаҳарларида ўтказилган тезкор тадбирлар натижасида бир нечта адвокатларнинг ноқонуний ҳаракатларига чек қўйилгани маълум қилинган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
