Ўзбекистонда олий таълим муассасалари битирувчиларини иш берувчилар билан боғлайдиган рақамли экотизим ишга туширилиши режалаштирилмоқда. Бу ҳақда президент Шавкат Мирзиёев ўзининг парламент ва халққа мурожаатида маълум қилди.
Янги тизим ёш мутахассислар ва малакали кадрлар талаб қилаётган корхоналар ўртасида тўғридан-тўғри кўприк вазифасини бажаради. Рақамли экотизимда талабалар академик кўрсаткичлари ҳамда корхоналардаги бўш иш ўринлари ҳақидаги маълумотлар онлайн тарзда акс эттирилади.
Бу иш берувчиларга потенциал ходимлар ҳақида тўлиқроқ тасаввурга эга бўлиш, битирувчиларга эса меҳнат бозорида тезроқ йўл топиш имконини беради. Ушбу тизимнинг жорий этилиши ёш мутахассислар учун иш қидириш вақтини қисқартириши ва компаниялар учун кадрлар танлаш жараёнини соддалаштириши кутилмоқда.
Шунингдек, Ўзбекистон олий ўқув юртлари битирувчилари учун Жанубий Кореяда ишга жойлашиш имкониятлари кенгаймоқда. Кёнссанбук-до провинцияси E-7 визаси орқали малакали мутахассисларни ишга қабул қилишни режалаштираётган ҳудудлардан бирига айланди.
