Тошкентдаги хусусий (нодавлат) боғчада болани калтаклаган тарбиячи ишдан бўшатилди. Бу ҳақда “Millar” хабар берди. Воқеа ижтимоий тармоқларда тарқалган видео орқали катта муҳокамага сабаб бўлди.
Маълум қилинишича, ҳодиса жорий йилнинг 22 январь куни Олмазор туманида жойлашган “American Daycare” номли нодавлат мактабгача таълим ташкилотида содир бўлган. Боғча масъуллари болага қўпол муносабатда бўлган тарбиячи ишдан олинганини билдирган. Яъни муассаса ўз ичида чора кўргани ва вазиятга бефарқ қолмагани айтилмоқда.
“Тушликда ухламагани учун боғча опа ҳамма бола турганидан кейин менинг фарзандимга нисбатан мана шунақа қўпол ҳаракатлар билан қўл кўтариб, бурнини қонатган. Боламни кийинтириб, юз-қўлини ювиб, ёнимга тушириб юборишганда мен боғчага келган эдим”, деган боланинг онаси. Унинг сўзларига кўра, ҳолат айнан бола тушлик пайтида ухламагани ортидан келиб чиққан.
Пойтахт Мактабгача ва мактаб таълими бошқармасига кўра, мазкур ҳолат бошқарма томонидан ўрганиш жараёнида бўлиб, ўрганиш натижасидан келиб чиққан ҳолда қўшимча маълумот тақдим этилади. Демак, расмий хулоса чиққач, яна аниқ тафсилотлар берилиши кутилмоқда.
“Zamin”ни Telegram'да ўқинг!
