Ҳуқуқ-тартибот идоралари Наманган шаҳрида товламачилик ва зўравонликка асосланган тартибсиз “кўча қонунлари”ни ўрнатишга уринган жиноий гуруҳ фаолиятига барҳам берди. Расмий маълумотларга кўра, мазкур гуруҳнинг ташкилотчиси Наманган шаҳрида яшовчи, муқаддам бир неча бор судланган шахс бўлган.
Наманган вилоят ички ишлар бошқармаси ахборот хизмати қайд этишича, у аввал ҳам фирибгарлик ва безорилик билан боғлиқ жиноятларни содир этиб жазо олганига қарамасдан, тўғри хулоса чиқармаган ва яна қонунга зид йўлга кирган.
Маълум қилинишича, у атрофига жиноятга мойил бир неча шахсларни тўплаб, улар билан тил бириктирган ҳолда шаҳар ҳудудида товламачилик ва безориликка доир қилмишларни амалга ошириб келган. Гуруҳ аъзолари фуқаролар ўртасидаги пул олди-берди ва келишмовчиликларни “куч билан ҳал қилиш” усулида ечишга уринган — яъни таҳдид, босим ва зўравонлик орқали таъсир ўтказган.
Қўлга олинган шахс — 28 ёшли Баҳриддин Зайниддин ўғли Насриддинов экани айтилмоқда. У муқаддам Жиноят кодексининг 277-моддаси биринчи қисми, 168-моддаси 4-қисми, 228-моддаси 3-қисми ҳамда 277-моддаси 2-қисми билан судлангани келтирилган.
Тергов материалларига кўра, Баҳриддин Насриддинов жиноий шериклари билан бирга Наманган шаҳрида яшовчи танишини Баркамол авлод маҳалласи ҳудудига чақирган. Унга “кўча ечимлари” («разборка»)га иштирок этмаётгани, чақирган вақтда келмаётгани ва бошқа баҳоналарни важ қилиб, қўли ҳамда ўткир кесувчи жисм билан уриб, тан жароҳати етказган.
Наманган вилояти суд-тиббий экспертизаси хулосасига кўра, жабрланувчининг чап елка қисмида кесилган ва санчилган жароҳатлар борлиги аниқланган.
Расмий хабарда айтилишича, “етакчиликка интилган”, ўзини “Эшон” лақаби билан танитган ушбу шахс гўё “кўча ишларини ҳал қилиш”ни даъво қилиб, фуқароларга нисбатан босим ўтказиб келган. У процессуал тартибда ушланган ва унга нисбатан Наманган шаҳар ички ишлар бошқармаси ҳузуридаги тергов бўлими томонидан Жиноят кодексининг 277-моддаси 3-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Ички ишлар органлари мазкур шахсдан жабр кўрган фуқароларни Наманган вилояти ички ишлар бошқармасига, ҳудудий ички ишлар органларига ёки 102 қисқа рақамига хабар беришга чақирган. Мурожаат қилган шахсларнинг маълумотлари сир сақланиши кафолатланиши ҳам алоҳида таъкидланган.
Бу каби ҳолатларда энг муҳими — “ўзим ҳал қиламан” деб хавфга кирмаслик. Қонун ишлаши керак, куч ишлатиш эмас.
“Zamin”ни Telegram'да ўқинг!
