Ўзбекистон Республикаси Президенти Шавкат Мирзиёев давлат ташрифи доирасида Исломобод шаҳрига келгач, дастурнинг муҳим нуқталаридан бири сифатида «Глобал саноат ва мудофаа ечимлари» компаниясининг бош қароргоҳига ташриф буюрди. У ерда давлат раҳбари Покистон Мудофаа кучлари Олий Бош қўмондони, Қуролли Кучларнинг қуруқликдаги қўшинлари қўмондони — фельдмаршал Асим Мунир билан учрашув ўтказди.
Музокаралар марказида Ўзбекистон ва Покистон ўртасидаги кўп қиррали ҳамкорликни янада чуқурлаштириш, стратегик шерикликни мустаҳкамлаш масалалари турди. Томонлар икки давлат муносабатларида янги босқичга олиб чиқиши мумкин бўлган йўналишларни атрофлича муҳокама қилди.
Айниқса ҳарбий ва ҳарбий-техник соҳадаги шерикликни кенгайтириш масаласига алоҳида урғу берилди. Хусусан, бугунги кунда хавфсизликка таҳдид солаётган турли хавф-хатарларга қарши курашишда саъй-ҳаракатларни мувофиқлаштириш, тажриба ва маълумот алмашиш каби йўналишлар муҳим экани таъкидланди.
Шунингдек, икки мамлакатнинг етакчи мудофаа саноати корхоналари ўртасида кооперация алоқаларини фаоллаштириш, қўшма ишлаб чиқариш ва технологик ҳамкорлик имкониятларини кенгайтириш масалалари ҳам кун тартибидан ўрин олди. Ҳарбий мутахассисларни тайёрлаш дастурларини кенгайтириш, малака ошириш, тажриба алмашиш, шунингдек, қўшма ўқув машғулотларини ташкил этишнинг амалий аҳамияти қайд этилди.
Учрашувда транспорт ва логистика йўналиши ҳам четда қолмади. Истиқболли инфратузилмавий лойиҳаларни амалга оширишни тезлаштириш, минтақавий боғлиқликни кучайтиришга хизмат қиладиган йўналишлар юзасидан фикр алмашилди. Бу эса ҳамкорликнинг фақат мудофаа билан чекланмасдан, иқтисодий ва стратегик манфаатларни ҳам қўллаб-қувватлашини кўрсатади.
Энг муҳим келишувлардан бири — ҳарбий ва ҳарбий-техник ҳамкорликни ривожлантириш бўйича алоҳида «йўл харитаси»ни тайёрлаш ҳақидаги қарор бўлди. Бу ҳужжат келгусидаги амалий қадамларни аниқ белгилаб, режаларни тизимли равишда ҳаётга татбиқ этишга хизмат қилиши кутилмоқда.
Учрашув якунида Президент Шавкат Мирзиёев «Глобал саноат ва мудофаа ечимлари» компаниясининг ишланмалари билан танишди. Жумладан, Покистоннинг замонавий ҳарбий техникаси ва қурол-яроғ намуналари намойиш этилди. Бу ташриф икки давлат ўртасидаги ишонч ва амалий ҳамкорликни янада мустаҳкамлаш йўлидаги муҳим қадам сифатида баҳоланмоқда.
“Zamin”ни Telegram'да ўқинг!
