Самарқанд шаҳрида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги нуфузли халқаро форум доирасида замонавий технологиялар намойиши ва махсус кўргазма ташкил этилди. Унда уюшган наркожиноятчиликка қарши курашда қўлланилаётган илғор рақамли ечимлар, техник воситалар ва махсус ускуналар кенг жамоатчиликка тақдим қилинди.
Кўргазма билан танишган Саида Мирзиёева наркотрафик, хавфли юклар ва трансмиллий жиноятчиликка қарши курашда инновацияларнинг ўрни жуда муҳим эканини алоҳида таъкидлади. Унинг фикрича, замонавий технологиялар хавфларни олдиндан аниқлаш ва уларга тезкор жавоб бериш имконини кенгайтиради.
Форум доирасида Ўзбекистон томонидан муҳим ташаббус ҳам илгари сурилди. Унга кўра, иштирокчи давлатлар учун наркотрафик ва трансмиллий жиноятчиликни реал вақтда кузатиб бориш имконини берувчи ягона сунъий интеллект платформасини яратиш таклиф қилинди. Бу тизим ахборот алмашинувини тезлаштириш ва халқаро ҳамкорликни янги босқичга олиб чиқишга хизмат қилиши кутилмоқда.
Тадбирда Шавкат Мирзиёев ҳам иштирокчиларга мурожаат қилиб, глобал таҳдидларга қарши курашда халқаро ҳамкорликнинг аҳамиятини алоҳида таъкидлади. Давлат раҳбари наркобизнес ва унга қарши кураш масаласига кенг қамровли ёндашув зарурлигини билдирди.
Унинг сўзларига кўра, бугунги кунда наркотик моддалар айланмаси фақат жиноий муаммо эмас, балки глобал иқтисодий ва хавфсизлик тизимига жиддий таъсир кўрсатаётган омилдир. Чунки наркобизнес миллиардлаб долларлик яширин иқтисодиётни шакллантириб, уюшган жиноятчилик ва терроризмни молиялаштириш манбаига айланмоқда.
Маълум қилинишича, жиноий даромадларнинг катта қисми рақамли активлар ва оффшор молиявий тизимлар орқали “ювиб ташланмоқда”. Бу эса кураш жараёнини янада мураккаблаштирмоқда.
Президентнинг таъкидлашича, наркобизнесга қарши энг самарали йўл унинг молиявий манбаларини йўқ қилишдир. “Агар биз унинг молиявий артерияларини узсак, бу иллатнинг ўзи йўқ бўлади”, — деди давлат раҳбари.
Қисқача айтганда, Самарқанддаги форум нафақат таҳдидларга қарши кураш масаласини муҳокама қилди, балки келажакдаги глобал хавфсизлик архитектураси учун ҳам муҳим ташаббусларни илгари сурди.
“Zamin”ни Telegram'да ўқинг!
