Мажбурий ижро бюроси Янгибозор тумани бўлими томонидан давлат манфаатлари ва корхоналар ҳақдорлигини таъминлаш борасида тизимли ишлар амалга оширилмоқда.
Хусусан, бўлим давлат ижрочиси А.Қадирберганов томонидан олиб борилган ижро ҳаракатлари натижасида йирик миқдордаги қарздорлик бартараф этилди.
Суд ва солиқ органининг ижро ҳужжатларига кўра, тумандаги “О.С.” фермер хўжалигининг жами 244,7 миллион сўмдан ортиқ қарздорлиги мавжуд бўлиб, ушбу маблағнинг 158,4 млн сўми давлат фойдасига солиқ қарздорлиги ҳамда 86,3 млн сўми “Ҳудудий электр тармоқлари” АЖ олдидаги қарз эканлиги қайд этилган.
Қарздорлик ўз вақтида тўланмаганлиги сабабли, давлат ижрочиси томонидан қатъий чоралар кўрилди. Фермер хўжалигига тегишли бўлган, Янгибозор тумани “Чўполончи” массивида жойлашган жами 65,6 гектар ер майдонининг узоқ муддатли ижарага олиш ҳуқуқи хатланди.
Мазкур ер майдонининг норматив қиймати тегишли мутахассислар томонидан 1,8 миллиард сўмдан зиёд деб баҳоланди ва Ўзбекистон Республикаси Президентининг 28.03.2025 йилдаги ПҚ-131-сонли қарори ижроси бўйича жорий йилнинг 15 апрель куни “E-AUKSION” электрон савдо майдончасига чиқарилди.
Фермер хўжалик раҳбари ер майдонидан айрилишини ўйлаб, барча қарздорликни тўлиқ бартараф этди. Қарздорлик тўлангани муносабати билан ижро иши амалда тамомланди ва ер майдонига қўйилган чекловлар бекор қилинди.
Ижро ҳужжатлари талабларини ўз вақтида бажариш, мол-мулкларингиз хатланиши ва аукцион савдоларига чиқиб кетишининг олдини олади.
“Zamin”ни Telegram'да ўқинг!
