Фото: Ижтимоий тармоқлар
Ижтимоий тармоқларда ППХ ходими билан боғлиқ ҳолат ҳақида хабарлар кенг муҳокама қилинмоқда. Унга кўра, вояга етмаган қизлар билан боғлиқ можаро юз бергани айтилган. Мазкур ҳолат юзасидан Ички ишлар вазирлиги қошидаги Жамоат хавфсизлиги департаменти расмий баёнот бериб, текширув ишлари бошланганини маълум қилди.
Дастлабки маълумотларга кўра, воқеа Оҳангарон шаҳрида содир бўлган. Қизнинг айтишича, Spark русумли автомобиль ҳайдовчиси уларни кўчада тўхтатиб, мажбуран транспорт воситасига ўтиришга ундаган. Шундан сўнг улар тоғли ҳудудга олиб кетилгани айтилмоқда.
Вазиятдан хабар топган жабрланувчининг яқини геолокация орқали уларни топиб, воқеага аралашгани қайд этилган. Бу ҳолат орқали можаро янада жиддий тус олган.
Ҳозирда ИИВ ички хавфсизлик бўлими прокуратура органлари билан ҳамкорликда барча ҳолатларни ўрганмоқда. Тергов доирасида воқеага алоқадор шахслар ва барча тафсилотлар аниқланмоқда.
Расмий манбаларга кўра, нашрларда тилга олинган ходим лавозимидан вақтинча четлаштирилган. Агар билдирилган даъволар тасдиқланса, унга нисбатан қонун доирасида қатъий чоралар, жумладан жиноий жавобгарлик қўлланилиши мумкин.
Вазирлик баёнотида алоҳида таъкидланишича, ҳуқуқни муҳофаза қилувчи органлар ходимларининг, айниқса, вояга етмаганларга нисбатан ҳар қандай ноқонуний хатти-ҳаракатлари мутлақо қабул қилиб бўлмайди ва бундай ҳолатлар қатъий жазога сабаб бўлади.
Қисқаси, ҳолат жамоатчилик назорати остида. Тергов якунлари эса қўшимча тарзда эълон қилиниши кутилмоқда.
“Zamin”ни Telegram'да ўқинг!
