Комил Алламжонов: Жиззахда Президентга кўзбўямачилик қилингани ҳақидаги хабарга муносабат (видео)

Ўзбекистон Президентининг матбуот котиби Комил Алламжонов Давлат раҳбарининг Жиззах вилоятига ташрифидан сўнг интернетда пайдо бўлган айрим материалларга муносабат билдирди. Алламжонов ўз баёнотларини Facebook’даги саҳифаси орқали, жонли эфирга чиқиб билдирди.

Аввалроқ баъзи манбаларда Ўзбекистон Президенти Шавкат Мирзиёевнинг Жиззах вилоятидаги «Зарбдор Текстиль» корхонасига ташриф буюрган вақти унинг қаршисида ҳақиқий ишчилар эмас, балки яқин-атрофдаги коллежларда таҳсил ўқувчи қизлар худди ишлаётгандек бўлиб ўтиргани, корхона аслида ҳали иш бошлашга тайёр эмаслиги ҳақида материаллар пайдо бўлди.

Президент матбуот котиби Комил Алламжонов «бундан хабардор» эканига алоҳида урғу берди.

Кейинги масала — куни кеча Жиззах вилоятига бўлган сафар жараёнида бир тикув цехига бўлган ташриф билан боғлиқ: «У ерда ишлаётган қизлар коллеж ўқувчилари, аслида бу кўзбўямачилик бўлди, булар ишчилар эмас», деган фикрлар пайдо бўлди. Бу масалага ҳам эътиборингизни қаратиб шуни айтмоқчиманки, бундан бизнинг хабаримиз бор.

Аҳамият берган бўлсангиз, бу тикув цехи 10 ой ичида йўқ жойдан пайдо бўлган. Ҳозирча бу цех 100 фоиз қувват билан иш бошлагани йўқ. Таъмирлаш, 100 фоиз қувват билан ишлашни ташкил қилиш жараён кетмоқда. Корхона раҳбарлари ушбу цех атрофидаги ҳудудда истиқомат қилувчи вақтинча ишсиз аёлларга, корхонага яқин жойлашган коллежлардан, ихтиёрий равишда, талабгор қизларга иш ўргатишни ва келажакда, коллежни битирганларидан кейин уларни ишчи сифатида қабул қилишни режалаштирган. Ҳозир эса фақат тайёргарлик жараёни кетяпти.

Кези келганда айтиб ўтмоқчиман — йиллар давомида тўпланган муаммолар бир кунда, бир ҳафтада, бир ойда ҳал бўлмайди. Албатта, бунинг учун вақт керак. Ушбу масалани тўғри тушунган ҳолда, масалага фақат бир томондан эмас, чуқурроқ қараб баҳо беришингизни, муносабат билдиришингизни ва Юртбошимиз бугун олиб бораётган ишларида уларга елкадош, кўмакдош бўлишингизни илтимос қиламиз ва шунга чақирамиз.

Комил Алламжонов, Ўзбекистон Президенти матбуот котиби

Маълумот учун, Президент матбуот хизмати 30 март куни Шавкат Мирзиёевнинг «Зарбдор Текстиль»га ташрифига доир ахборот эълон қилган эди.

Янгиликлар