Украина президенти Зеленскийнинг ўзбекистонлик қиёфадоши билан суҳбат (фото)

Яқинда россиялик журналистлар Москва метросида Украинанинг янги сайланган президенти Владимир Зеленский “эгизагини” топишди. Ижтимоий тармоқларда Зеленскийга жуда ўхшаш кишининг метрода ухлаб кетаётгани акс этган сурат вирус каби тарқалди...

Ушбу суратни илк бор Facebook фойдаланувчиси Дмитрий Коваленко ўз саҳифасига жойлаган эди. “Мана у, ҳақиқий президент. Кортежсиз, қўриқчисиз ва ҳатто велосипедсиз. Оддий ва камтар... метрода ишга кетяпти”, деб ёзган эди у сурат изоҳига. Шундан кейин суратдаги Украина президенти эмас, балки унинг қиёфадоши эканлиги ва у ўзбекистонлик Умид Исабоевлиги маълум бўлди. Россиялик журналистлар уни кўрсатувларига чақира бошлашди. Биз ҳам ҳамюртимиз билан яқиндан танишдик.

— Дастлаб сизни танитган ўша сурат ҳақида гаплашсак. Ўшанда сизни кимдир суратга олаётганини сезганмидингиз? Ўзингиз биринчи марта қаерда кўрдингиз?
— Бу суратни менга уйимдагилар интернетдан жўнатишди, улар ҳам ижтимоий тармоқларда тарқалганида кўриб қолишган. Шунда биринчи марта кўрдим. Аввалига ҳайрон бўлдим, ким ва нега олган экан, деб. Кейинроқ билсам, украиналик журналист Дмитрий Коваленко олган экан. У билан ҳозирда интернет орқали мулоқот қилиб турамиз. Унинг айтишича, Москвага иш билан келганида мени кўчада кўриб қолган ва Зеленскийга ўхшатган. Кейин ортимдан кузатиб борган, метрога ҳам тушган. Рўпарамга ўтириб, суратга олган. Бу ишни кўзим илиниб, бироз уйқуга кетган чоғимда қилгани учун ҳеч нарсани сезмаганман.

— Владимир Зеленский Украина Президенти бўлмасидан аввал уни танирмидингиз? Ахир у таниқли қизиқчи эди...
— Ҳа, қизиқчилигини, шу йўналишдаги кўрсатувларда чиқишини эшитиб юрардим, лекин унчалик қизиқишим бўлмагани учун кўрмаганман.

— Биринчи марта унга сизни ким ўхшатган?
— 2016 йили Москва шаҳрида бир ҳамюртимизнинг туғилган кунига йиғилгандик. Унинг Украинадан келган қўшнилари ҳам меҳмон бўлишди. Шунда қўшнилардан бири менга: “Сен қизиқчи Зеленскийга ўхшар экансан”, деди. Бу гапни ҳазилга йўйиб, кулиб қўйгандим. Метродаги суратим тарқалгач, кўпчилик ўхшата бошлади ва Зеленскийнинг “эгизаги"га айландим-қолдим (кулади).

— Россия телеканалларида ҳам кўрина бошладингиз...
— “Россия 1” телеканалининг “60 дақиқа” дастурида, НТВ телеканалининг “Марказий телевидение” дастурига таклиф қилишди. “Первый канал”(“Биринчи канал”)да мен ҳақимда махсус лавҳа тайёрланди. Машҳур бошловчи Андрей Малахов билан кўришдим.

Кўрсатувнинг бирида менга: “Украина президентига қандай савол берган бўлардинг?” деб савол берилди. Мен эса ҳаяжондан: “Нега Сиз менга бунчалик ўхшайсиз?” деган бўлардим, деб юбордим(кулади). Табиатан сўзга чечан эмасман.

Ҳозирда метрода, транспортда юрсам ҳам одамлар таниб қолишган, ишхонада мени ҳазил қилиб Дима Зеленский деб чақиришади. Умуман, дунёда ўхшаш инсонлар кўп, деб ўйлайман. Мен ҳам шулар қаторида бўлсам керак.

— Асли Намангандан экансиз? Москвага сизни нима етаклади?
— Наманганнинг Чортоқ тумани Алихон шаҳарчасида туғилганман. Болаликдан телевизорларда Москвани кўриб, бир марта бўлса ҳам боришни, Кремль майдонида расмга тушишни орзу қилардим. 1998 йил биринчи марта саёҳатга отландим. Поездда кетаётиб, деразадан узун-узун гумбазларни кўриб, шу Москва бўлса керак, деб ўйлаб, поезддан тушиб қолганман. Кейин билсам бу Самара шаҳри экан...

2008 йил Москванинг ўзига келдим. Бу ерда автосервисда ишлайдиган ватандошларни учратиб қолдим. Улар билан бироз ишладим. Автосервис раҳбарлари ишимни кўриб ёқтириб қолишди ва шу ерда қолиб ишлашни таклиф қилди. Шу тариқа 10 йилдан бери Россиядаман.

Шу ўринда айтмоқчиманки, мен бу ерга ишсизликдан ёки моддий жиҳатдан қийинчиликдан келмаганман, чунки Наманганда ҳам устачилик қилардим, доимий мижозларим ва шунга яраша даромадим ҳам бор эди. Яхши одамлар таклифини рад этолмадим.

— Келгуси режаларингиз қандай?
— Оилалиман, икки фарзандим бор. Уларнинг камолини кўришни истайман. Албатта, ўйлаб қўйган режаларим йўқ эмас. Наманганда ҳамма қулайликларга эга, замонавий автосервис очмоқчиман. Кўпчилик ёшларимиз ўқишга топширади, киролмаса, иш тополмай бекорчи бўлиб қолади. Мақсадим — мана шундай вақтинча ишсиз ёшларни иш билан таъминлаш. Яна фермерликка қизиқаман, чорвачилик ёки туяқушлик фермасини ташкил қилиш режам бор.

«Замин»ни Telegram’да ўқинг!