Ўзбекистон-Америка қўшма корхонасига чорвачиликни ривожлантириш учун ер ажратилади

«Agro kompleks Karakalpakstan» қўшма корхонасига чорвачиликни ривожлантириш учун ер ажратилади.
Вазирлар Маҳкамасининг «Agro kompleks Karakalpakstan» қўшма корхонасига чорвачиликни ривожлантириш учун ер ажратиш тўғрисида»ги фармойиши лойиҳаси эълон қилинди.

Ўзбекистон Республикаси Ер кодексининг 24-моддасига асосан «Agro kompleks Karakalpakstan» Ўзбекистон-Америка қўшма корхонасига чорвачиликни ривожлантириш учун:

Тахтакўпир туманидаги «Қараой» овул фуқаролар йиғини ҳудудидаги захира ер майдонларидан чорвачиликни ривожлантириш мақсадида умумий майдони 114,4 гектар шундан: 91,6 гектар суғориладиган экин ер майдонлари, 11,4 гектар бўз ерлар, 7,6 гектар сув ости ерлари, 0,8 гектар йўллар ва 3 гектар қишлоқ хўжалигида фойдаланилмайдиган бошқа ер майдонлари;

Тахтакўпир туманидаги «Қараой» овул фуқаролар йиғини ҳудудидаги захира ер майдонларидан чорва моллари учун озуқа базасини таъминлаш мақсадида умумий майдони 488,8 гектар шундан: 338,6 гектар суғориладиган экин ер майдонлари, 12,1 гектар бўз ерлар, 49,9 яйлов ер, 58,8 гектар сув ости ерлари, 19,4 гектар йўллар ва 10 гектар қишлоқ хўжалигида фойдаланилмайдиган бошқа ер майдонлари;

Тахтакўпир туманидаги захира ер майдонларидан қўйчиликни ривожлантириш мақсадида умумий майдони 996,47 гектар шундан: 845,87 гектар яйлов ер, 136,22 гектар сув ости ерлари, 12,89 гектар йўллар ва 1,49 гектар қишлоқ хўжалигида фойдаланилмайдиган бошқа ер майдонлари «Agro kompleks Karakalpakstan» қўшма корхонасига 30 йил муддатга ижара ҳуқуқи асосида ажратиб берилади.

Қорақалпоғистон Республикаси Вазирлар Кенгаши Ўзбекистон Республикаси Ер ресурслари геодезия картография ва давлат кадастри давлат қўмитаси билан биргаликда белгиланган тартибда ер участкаларини «Agro kompleks Karakalpakstan» қўшма корхонасига узоқ муддатли ижарага бериш тўғрисида шартномасини расмийлаштиради.

Ўзбекистон Республикаси Экология ва атроф муҳитни муҳофаза қилиш давлат қўмитаси «Agro kompleks Karakalpakstan» қўшма корхонасига ажратилган ер майдони бўйича атроф-муҳитга таъсир тўғрисидаги ариза лойиҳасини қонунчиликда белгиланган тартибда давлат экологик экспертизасидан ўтказилишини таъминласин ҳамда табиатни муҳофаза қилиш қонунчилигига қатъий риоя этилиши юзасидан давлат назоратини ўрнатади.

Қорақалпоғистон Республикаси Вазирлар Кенгаши, Ўзбекистон Республикаси Ер ресурслари, геодезия, картография ва давлат кадастри давлат қўмитаси «Agro kompleks Karakalpakstan» қўшма корхонасига чорвачиликни ривожлантириш мақсадида ижара ҳуқуқи асосида фойдаланиш учун берилаётган суғориладиган экин ерлар ва бўз ерлар майдонларидан фақат чорва моллари учун озуқа базаси сифатида фойдаланилиши ва бошқа объектлар қурилишига йўл қўймаслик учун шахсий жавобгарлик юклатилади.

«Agro kompleks Karakalpakstan» қўшма корхонаси ижарага берилган ерни ижара муддати тугагандан сўнг фойдаланиш мумкин бўлган ҳолга келтириб, Тахтакўпир тумани захира ерларига қайтариб беришни таъминлайди. “Замин” янгиликларини “Twitter”да кузатиб боринг