Тошкентда коронавирусни пуллик текшириш бошланади

24 июнь кунидан бошлаб нодавлат тиббиёт ташкилотларига ихтиёрий мурожаат қилган давлат ва нодавлат ташкилотларининг ходимлари ҳамда фуқароларни ушбу инфекцияга пуллик асосда текширишга рухсат берилганди.

Тошкент шаҳар Санитария-эпидемиологик осойишталиги маркази раҳбари Малика Қудратхўжаеванинг берган маълумотига кўра, шу йилнинг 25 июнь санасига қадар Тошкент шаҳрида жойлашган «Тиббиёт дунёси», «SWISS LAB», «VITROS DIAGNOSTICS», «GENOTEXNOLOGIYA» ва «AKFA MEDLINE» сингари нодавлат тиббиёт ташкилотлари ўз лабораторияларида коронавирус инфекциясини пуллик асосда текшириш хизматини ташкил этиш бўйича шартнома имзолашган.

Ушбу нодавлат тиббиёт муассасалари лабораторияларида яратилган шароитлар ўрганилиб, коронавирус инфекциясини текшириш учун белгиланган талабларга жавоб бериши тўғрисидаги тегишли хулосалар берилди.

Шунга кўра, пойтахтимизда биринчилардан бўлиб «Тиббиёт дунёси» МЧЖ ушбу йўналишдаги фаолиятини 24 июндан бошлаган бўлса, қолган нодавлат тиббиёт ташкилотлари ҳам шу ҳафта ичида коронавирус инфекциясини пуллик асосда текширишни бошлашини маълум қилишган. «Замин»ни Telegram’да ўқинг!