Путин ва Лукашенко Сочида «юзма-юз» учрашув ўтказади

Томонлар ҳамкорликни риавожлантириш ва «юзага келган муаммоларга биргаликда жавоб қайтариш» масалаларини муҳокама қилишади. Лукашенко айни вақтда Россияга йўл олган.

Беларусь президенти Александр Лукашенко музокаралар ўтказиш учун Россияга учиб кетди. Бу ҳақда Беларусь ҳукуматига қарашли «Пул первого» Telegram канали хабар берган.

БелТА агентлиги президент матбуот хизматига асосланиб хабар беришича, Лукашенко Россия президенти Владимир Путин билан «юзма-юз» форматида учрашади. Учрашув Сочидабўлиб ўтади.

Агентликнинг қайд этишича, музокаралар чоғида томонлар «турли соҳалардаги икки томонлама ҳамкорлик ҳолати ва ривожланиш истиқболлари, иттифоқ муносабатлари мавзулари» муҳокама қилинади, шунингдек, «халқаро муаммолар, минтақадаги вазият ва юзага келган чақириқларга биргаликда жавоб қайтариш» масалалари кўриб чиқилади.

Бу Лукашенконинг 9 август кунги президентлик сайловларида ғолиб бўлишидан кейинги илк расмий ташрифидир. У қайта сайланиши аҳолида норозилик уйғотди ва мамлакат ҳафталар давомида намойишлар гирдобида қолди. Аввалроқ Россия президенти матбуот хизмати 14 сентябрь куни Сочидаги учрашувда «Россия-Беларусь муносабатлари, стратегик шериклик ва иттифоқни янада ривожлантиришнинг муҳим масалаларини муҳокама қилиш» режалаштирилгани ҳақида хабар берганди.

Беларусдаги президентлик сайловларидан кейин Лукашенко ва Путин доимий равишда телефон орқали мулоқот қилиб турибди, август ойи охирида улар ўзаро учрашув ўтказишга келишишганди.

3 сентябрь куни Лукашенко Россия президенти билан учрашувда Минск ва Москва муносабатларидаги ҳал қилинмаган масалаларга «нуқта» қўйилиши ҳақида гапирганди. “Замин” янгиликларини “Facebook”да кузатиб боринг