Райҳон,Муниса Ризаева, Сарвар ва Комил Канизанинг айбловларига муносабат билдирди

Хонанда Каниза концерт олди матбуот анжуманида бир нечта ҳамкасбларини ундан ғоя ўғирлаганликда айблагани ҳақида хабар берилган эди.

Райҳон, Муниса Ризаева, Сарвар ва Комил Канизанинг эътирозларига “Ҳордиқ” газетаси орқали муносабат билдирди, дейилади "Даракчи" нашрида.

Райҳон:
—Мен Канизанинг қўшиқларини эшитмаганман. Кеча телеканалдан ҳам қўнғироқ қилишди ва шу мавзуда кўрсатув тайёрламоқчи эканликларини айтиб, интервью беришимни сўрашди. Ўзимга эп кўрмаганим учун рози бўлмадим. “Табиб” қўшиғимнинг муаллифлари Сарвар ва Комил фақат биргина сўз ўхшаш эканлигини маълум қилишди.

Сарвар (Райҳоннинг сўнгги хит тароналари айнан шу ижодкорга тегишли):
—Ўзбек тили жуда бой тил. Райҳоннинг “Табиб” таронаси илк бора янги концертида янграган эди. Биз “табиб”, “ҳабиб” деган сўзларни Каниза қўшиқ қилиб айтмасидан олдинроқ ҳам билганмиз ва бемалол бу сўзлардан фойдаланганмиз. Бу сўзларни Каниза хусусийлаштириб олмаган. Ўзбек тилининг луғатидан истаган одам истганича фойдаланиши мумкин. Бундан чиқди, Каниза қўшиғида “Жонон бўламан” жумласидан фойдаланса, демак шу қўшиқдан ўғирлаган бўлар экан-да?! Канизанинг эътирози, очиғи, бизнинг кулгумизни келтирди.

Муниса Ризаева:
—Каниза каби менинг ҳам ўз йўналишим ва дидим бор. Бизни солиштиришнинг ўзи, билмадим, қандай бўлади? Умуман олганда, нафақат Каниза, балки ҳеч кимга тақлид қилмайман. Айниқса, кийиниш борасида! Ҳар бир ўзбек аёлининг рўмол ўраш услуби бор. Мен ҳам клипимда рўмолни аёлларимиз ўрайдиган усуллардан фойдаланган ҳолда ўраганман. Бундан чиқди, клипида рўмол ўраб чиққан ҳар бир хонанда Канизага тақлид қилган бўладими?

У ўзбекона урф-одатларимиз-ку! Мен “Ёнар” номли қўшиғимга ишланган клипда ҳақиқий ўзбек келини образини кўрсатиб берганман ва у Каниза яратган образдан фарқ қилади.

Каниза ўз устида қандай ишлаётган бўлса, биз ҳам ундан кам изланаётганимиз йўқ.