“Калмар ўйини” юлдузи Ли Жон Же ҳақида нималар маълум?

“Калмар ўйини” драмаси туфайли оламшумул машҳурликка эришган 53 ёшли актёр Ли Жон Же йилдан йилга танилиб бормоқда. Юлдузнинг ижодий йўли ва шахсий ҳаёти ҳақида батафсил маълумот берамиз.

- Фаолияти: актёр, кино, модел
- Туғилган санаси: 1972 йил 15 декабрь
- Туғилган жойи: Сеул, Жанубий Корея
- Ёши: 53
- Бўйи: 180
- Оилавий ҳолати: уйланган

Жанубий кореялик актёр Ли Жон Же ажойиб карьераси туфайли подиумлар ва кино юлдузига айланди. Актёр 50 ёшга тўлишидан бир оз олдин “Калмар ўйини” сериалида бош ролни ўйнаб, бутун дунёга машҳур бўлди. Ҳозирда унинг фильмографиясидаги ҳар бир янги лойиҳа катта қизиқиш уйғотмоқда.

Болалик ва ўсмирлик даври

Жон Же ёшлигида қаҳвахонада ишлаган. Бир куни у ерга машҳур дизайнер ташриф буюриб, йигитдаги харизмани пайқайди ва бирга ишлашни таклиф этади. Шу тасодифий учрашувдан сўнг Ли бир неча йил давомида подиумларга чиқиб, модел сифатида суратга тушади.

Жон Же Жанубий Кореяда унга шуҳрат келтирган шоколад рекламасида суратга тушди. Шундан сўнг йигитни фильм суратга олиш майдончаларига ҳам таклиф қила бошлашади, бироқ биринчи лойиҳадан кейин Ли бу касбга ҳали тайёр эмаслигини тушунади. Актёрлик сирларини чуқур ўрганиш учун Тонгук университетининг театр санъати факультетига ўқишга киради. У бўш вақтларида актёрлик маҳорати бўйича машғулотларга қатнарди.

Фильмлардаги иштироки

Жон Же 1993 йилда “Динозаврлар ўқитувчиси” драмасида рол ўйнаб, кино экранларида илк бор кўриниш беради. Шундан сўнг ёш актёр тўлиқ метражли фильм ва сериалларда бош ролларга таклиф этила бошлайди. Лининг биринчи катта иши “Йигитча” номли жиноий драма бўлади. Бу роли учун сеуллик актёр энг яхши янги юлдуз сифатида Жанубий Кореянинг нуфузли “Мовий аждаҳо” ва “Катта қўнғироқ” мукофотларига сазовор бўлади. “Туйғу” драмасида суратга тушгандан сўнг эса Ли ҳақиқий машҳурликка эришади.

Жон Женинг касбий фаолиятидаги кейинги катта муваффақиятга 1998 йилда “Кунчиқар шаҳар” драмаси экранларга чиққандан кейин эришади. Бу роли учун актёр навбатдаги “Мовий аждаҳо” ва Корея кинотанқидчилар уюшмаси мукофотини қўлга киритади.

Икки йил ўтгач, Ли “Денгиз бўйидаги уй” мелодрамасида бош ролни ижро этади. Кейинчалик Warner Брос компанияси бу асарни қайта суратга олиш ҳуқуқини сотиб олади. 2006 йилда “Кўл бўйидаги уй” номи билан қайта ишланган фильм чиқади. Унда Жон Же ижро этган қаҳрамонни Киану Ривз ўйнайди.

2010 йилда актёр Канн кинофестивали ва Торонтодаги Халқаро кинофестивалда намойиш этилган “Хизматкор” триллерида бош ролни ўйнайди ва бир нечта Жанубий Корея ва Осиё мукофотларига номзод бўлади.

Шундан сўнг актёрнинг карьераси аста-секин тиклана бошлайди. Шундай қилиб, 2012 йилда Ли “Ўғрилар” комедиясида ҳам иштирок этади, бу кейинчалик Корея киноси тарихидаги олтинчи энг кўп даромад келтирган фильмга айланади. Бир йил ўтгач, Жон Же “Мовий аждар” мукофоти ва “Баэксанг” санъат мукофотига иккинчи пландаги энг яхши актёр сифатида сазовор бўлган “Ўқувчи юз” фильми чиқади.

2022 йилда Ли режиссёр сифатида дебют қилади. Воқеалар 80 йилларда содир бўладиган “Ов” фильмини яратиш учун актёрга 4 йил керак бўлди.

“Калмар ўйини”

2021 йил сентябрда Netflix платформасида премераси бўлган 9-қисмли “Калмар ўйини” драмаси Лига оламшумул машҳурлик олиб келди. Жон Же триллерда қарзларини тўлаш учун пулга муҳтож бўлган Сонг Ки Хун исмли қиморбозни ўйнаган. Мазкур сериал 90 мамлакатда, шу жумладан, АҚШ ва Буюк Британияда томошабинлар рейтингида энг юқори чўққига кўтарилди.

2022 йил кузида Жон Же “Калмар ўйини” драматик сериалидаги энг яхши эркак роли учун “Эмми” мукофотига сазовор бўлди. Ушбу номинациядаги ҳайкал учун у билан бирга Жейсон Бейтман, Жереми Стронг ва Адам Скотт кураш олиб боришди.

Лойиҳанинг омад келтирган 1-мавсуми ижодкорларни давомини чиқаришга илҳомлантирди. Суратга олиш ишлари 2023 йилнинг ёзида Жанубий Кореяда бошланган ва деярли бир йил давом этган.

Бизнес ва реклама

Актёрлик фаолиятидан ташқари, Жон Же бизнес билан шуғулланади — актёр эркаклар кийимлари ва ички кийим дўконлари очган. Ли, шунингдек, продюсерлик компанияси ва кўнгилочар лейбл эгаси. Актёр она шаҳрида 2000 йилда бош ролни ижро этган фильм шарафига “Ил Маре” деб номланган италян ресторанлари тармоғига асос солган.

2023 йилнинг ёзида Жон Женинг Италиянинг Gucci модалар уйи билан ҳамкорлиги маълум бўлди. Тармоқда Тҳе Савой меҳмонхонаси фонида суратга олинган Gucci Валигериа реклама кампаниясидан суратлар пайдо бўлди.

Ли Жон Женинг шахсий ҳаёти

Ҳатто машҳур бўлса-да, қадди-қомати келишган актёр узоқ йиллар бўйдоқ бўлган. 2000 йилларнинг бошларида Жон Же актриса Ким Мин Хи билан учрашади, аммо улар 3 йиллик муносабатлардан кейин ажралишган.

Ажралишдан сўнг, актёр Жанубий Кореянинг нефть ва газ қазиб чиқариш, автоэҳтиёт қисмлар ва бошқа маҳсулотлар ишлаб чиқариш конгломерати президентининг тўнғич қизи Им Се Рён билан учрашаётгани ва унга уйланмоқчи экани ҳақида миш-мишлар тарқалади. Бироқ улар бу маълумотни рад этиб, иш бўйича шерик эканликларини таъкидлади.

2020 йил бошида эса Ли аллақачон уйлангани ва ота бўлганини маълум қилиб, мухлисларини ҳайратда қолдиради. Фан клубида актёр 2009 йилда уйлангани ва бир йилдан сўнг қизли бўлганини ёзган. Яна 3 йил ўтгач, хотини ўғил фарзандини дунёга келтирган.

Жон Же ушбу фактларни узоқ йиллар давомида яширгани учун мухлисларидан узр сўраб, нима учун бундай қилганини тушунтиради — у яқинларини омма диққат марказида бўлишини хоҳламаган. Актёрнинг айтишича, унинг оиласи хорижда яшайди.

Ҳозир Лининг карьераси энг юқори чўққида. Уни нафақат Жанубий Корея, балки халқаро лойиҳаларга ҳам таклиф қилишади. Актёр иштирокидаги “Юлдузлар жанги” оламига асосланган “Аколит” илмий-фантастик минисериали 2024 йилнинг асосий премераси бўлди. Сериалда Жон Же Соло ролини ижро этган, унинг ҳамкасблари эса Amanda Стенберг, Дафни Кин ва Чарли Барнетт бўлган.

Актёр ижро этган Сон Ки Хун 2024 йил декабрь ойида стримингга чиққан “Калмар ўйини”нинг 2-мавсумида ҳам иштирок этади. Шубҳасиз, машҳур сериалнинг давоми томошабинларга қаҳрамоннинг шахсий ҳаётидан қизиқарли фактларни тақдим этади.

Актёр ҳақида қизиқарли фактлар

• 90 йиллар охирида Ли маст ҳолда рулга ўтириб, автоҳалокатга учрайди.
  
• “Калмар ўйини”нинг финалида қаҳрамон Жон Женинг сочлари қизил. Бунинг учун актёр парик кийиб юрган.
  
• Ли хайрия ишлари билан шуғулланади, жумладан, табиий офатларда ёрдам бериш ассоциацияси билан ҳамкорлик қилади, қийин вазиятларда ватандошларга ёрдам беради.
  

“Замин” янгиликларини “Telegram”да кузатиб боринг