Сўнгги йилларда корейс дорамалари бутун дунёда катта трендга айланди. Netflix, Disney+, Apple TV+ каби йирик платформалар корейс сериалларига жиддий сармоя кирита бошлагач, машҳур актёр ва актрисаларнинг гонорарлари ҳам рекорд даражага кўтарилди. Бугун айрим корейс юлдузлари биргина эпизод учун юз минглаб доллар, баъзилари эса миллион долларгача ҳақ олмоқда.
Бу рўйхатда энг кўп тилга олинадиган юлдузлардан бири Ли Жон Же ҳисобланади. У “Кальмар ўйини” сериалидаги Сон Ги Ҳун образи орқали дунё миқёсида машҳурликка эришди. Ушбу лойиҳа актёрни нафақат Кореяда, балки Голливуд даражасида танилган юлдузга айлантирди. Маълумотларга кўра, Ли Жон Же “Кальмар ўйини”нинг кейинги мавсумлари учун ҳар бир эпизоддан 700 минг доллардан 1 миллион долларгача гонорар олган.
Кейинги ўринда Пак Бо Гом туради. У “Жавоб 1988” ва “Ой нуридаги севги” каби машҳур сериаллари орқали томошабинлар қалбидан жой олган. Актёрнинг самимий образи, табиий ижроси ва кенг мухлислар аудиторияси уни Кореянинг энг талабгир актёрларидан бирига айлантирди. Пак Бо Гом бир эпизод учун тахминан 350 минг доллар атрофида ҳақ олиши айтилади.
Ли Мин Ҳо ҳам корейс дорамалари тарихидаги энг машҳур актёрлардан бири саналади. У “Гулдан гўзал йигитлар” сериалидан кейин Ҳаллю — корейс тўлқинининг асосий юлдузларидан бирига айланди. Бугунги кунда Ли Мин Ҳо бир эпизод учун ўртача 200 минг доллар ёки ундан юқори гонорар оладиган актёрлар қаторида тилга олинади.
