Ҳинд кинокомедиялари ва рақс саҳналари севувчилари учун Митхун Чакраборти исми таниш. Унинг тўлиқ исми Гоуранг Чакраборти. У 1950 йил 16 июнда Бенгалияда туғилган ва 1970 йилларда Болливуд саҳнасига қадам қўйган.
Митхун 1979 йилда актриса Йогита Балига уйланди. Улар бирга тўрт нафар фарзанд тарбиялашган: учта ўғил – Мимох (Махакшай), Ушмай, Намааши ва бир фарзандни асраб олишган – қизалоқ Диша.
Унинг катта ўғли Мимох ҳам актёр бўлган.
Митхун оилапарвар инсон сифатида танилган ва кўпинча ўз фарзандлари билан вақт ўтказишдан завқ олишини таъкидлайди.
Митхун ёшлигидан спортга қизиққан ва университетда ўқиган пайтда профессионал каратэ билан шуғулланган. У қора камар соҳиби.
Митхун Чакраборти нафақат актёр, балки сиёсатчи ва тадбиркор ҳамдир. У турли хайрия ишлари билан ҳам шуғулланган ҳамда қашшоқ болалар учун бир неча мактаблар ва болалар уйларини қўллаб-қувватлаган.
Митхунни дунёга танитган асосий фильм – “Disco Dancer” (1982) бўлди. Ундаги рақслар ва жозибали қўшиқлар нафақат Ҳиндистонда, балки Совет Иттифоқида ҳам ҳақиқий сенсация бўлди. Ўша йилларда Тошкент, Самарқанд ва Фарғонада ҳам бу фильм катта қизиқиш билан томоша қилинган, қўшиқлари халқ орасида кўп ижро этилган.
Унинг кино оламидаги йўли осон бўлмаган. Митхун биринчи маротаба “Mrigayaa” (1976) фильмида суратга тушиб, ўшандаёқ “Энг яхши дебют” учун Миллий мукофотни қўлга киритган. Кейинчалик унинг фильмлари “Dance Dance”, “Kasam Paida Karne Wale Ki” хитга айланди.
1980 йилларда Митхун актриса Шри Деви билан муносабатда бўлгани ҳақида кўп овозалар тарқалган. Айтишларича, улар ҳатто яширинча турмуш қуришган деган хабарлар ҳам бўлган. Бироқ бу муносабат узоққа бормаган ва Шри Деви кейинчалик продюсер Бони Капурга турмушга чиққан.
Бугунги кунда ҳам у Ҳинд кино индустриясининг рамзий қаҳрамонларидан бири сифатида эъзозланади. Ўзбекистонда эса у абадий “Диско қаҳрамони” сифатида эсда қолган.
«Замин»ни Telegram’да ўқинг!
