Ёш актриса Белла Рамсей Marvel оламидаги энг севимли қаҳрамонлардан бири — Ўргимчак одамни ижро этишни исташини айтди. У бу ҳақда Variety нашрига берган суҳбатида тўхталиб ўтган.
“Мен ҳам Spider-Man бўлишим мумкин эди”, — деди у журналистнинг қайси суперқаҳрамон ролини ўйнашни хоҳлайсиз деган саволига жавобан.
Рамсейнинг таъкидлашича, 2016 йилдан бери Marvel киноман оламида Ўргимчак одам образини жонлантириб келаётган Том Холланд “жуда яхши иш бажарган”. “Шундай экан, эҳтимол Marvel мен учун янги қаҳрамон яратишига тўғри келар”, — дея кулди актриса.
Қизиғи шундаки, Рамсей икки ой аввалгина биринчи бор Marvel филмини томоша қилганини айтди. У танлаган картина эса “Spider-Man” бўлиб, унда бош қаҳрамонни бошқа актёр — Эндрю Гарфилд ижро этган.
21 ёшли Белла Рамсей HBO каналида намойиш этилган ва шу номли компьютер ўйини асосида суратга олинган “The Last of Us” сериалидаги Элли роли орқали катта шуҳрат қозонган. Шунга қарамай, сериал мухлислари орасида унинг танланишига нисбатан турли фикрлар билдирилган — кўплар актрисанинг ташқи қиёфаси ва анимациядаги қаҳрамон образи ўртасидаги фарқ сабабли норозилик билдиришган.
«Замин»ни Telegram’да ўқинг!
