Илон Маск инсоният тарихида илк бор бойлиги 700 миллиард доллардан ошиб кетган шахсга айланди. Бу рекорд натижа, асосан, Tesla акциялари қийматининг ошиши билан боғлиқ.
Маълум қилинишича, Маск бойлигининг кескин ўсишига Делавер штати Олий судининг сўнгги қарори жиддий туртки бўлган. Суд Tesla акцияларига оид опционлар — яъни акцияларни олдиндан, одатда бозор нархидан арзонроқ харид қилиш ҳуқуқи — бўйича аввал бекор қилинган қарорни қайта кўриб чиқиб, уларни тиклади. Ҳозирда ушбу опционлар қиймати тахминан 139 миллиард долларга баҳоланмоқда.
Forbes нашри 2024 йил январидан бери ушбу опционларнинг қийматини эҳтиёткорлик билан 50 фоизга камайтириб ҳисоблаб келган эди. Бироқ суд қарори ортидан бу ёндашув қайта кўриб чиқилди ва натижада Илон Маскнинг умумий бойлиги қўшимча 69,5 миллиард долларга ошди. Айни пайтда тадбиркорнинг капитали 749 миллиард доллар атрофида баҳоланмоқда.
Эътиборли жиҳати шундаки, Маск 15 декабрь куниёқ бойлиги 600 миллиард доллардан ошган тарихдаги илк инсон сифатида қайд этилган эди. Шу ойда эълон қилинган тендер таклифидан сўнг унинг SpaceX компаниясидаги қарийб 42 фоизлик улуши 336 миллиард долларгача қимматлашди. Ҳозирда SpaceX’нинг умумий баҳоси 800 миллиард долларга етган бўлиб, бу август ойидаги 400 миллиард долларлик кўрсаткичдан икки баробар юқори.
Шунингдек, Илон Маск аввал ҳам тарихда илк бор 500 миллиард долларлик бойликка эга бўлган шахс сифатида қайд этилган — бу воқеа 1 октябрь куни рўй берган эди. Айни пайтда унинг қиймати бўйича иккинчи йирик активи — SpaceX’даги улуши — Tesla’даги активларидан тахминан 2 миллиард долларга арзонроқ экани айтилмоқда.
Мутахассислар фикрича, Илон Маскни дунёдаги биринчи триллионерга айлантириши мумкин бўлган асосий омил ҳам айнан SpaceX ҳисобланади. Компания 2026 йилда IPO ўтказишни режалаштирмоқда. Агар бу амалга ошса, SpaceX бозорда тахминан 1,5 триллион долларга баҳоланиши мумкин. IPO эса хусусий компания акцияларининг биринчи марта фонд биржасида оммавий инвесторларга таклиф этилиши жараёни ҳисобланади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
