Хонанда Озода Нурсаидованинг 2002 йилда куйланган "Бемор қиз ноласи" ҳамда 2006 йилда ижро этилган "Кечагимас 2" тароналари асосида фильм учун сценарий ёзилган. Дастлаб ушбу фильмнинг бош ролига айнан Озода Нурсаидованинг ўзи таклиф этилган.
Бироқ хонанда кинода рол ўйнамаслигини, ҳар ким ўз соҳасида ишлагани маъқул деб ҳисоблашини билдирган. У берган интервюларидан бирида: «Нега кинода рол ўйнамайсиз?» деган саволга, инсон ўз касбини сидқидилдан қилгани тўғрироқ бўлишини айтиб ўтган.
Шунингдек, Озода Нурсаидова бир пайтлар кўплаб фильмларга бош рол учун таклифлар бўлганини, аммо уларнинг барчасини рад этганини ҳам маълум қилган.
Бироқ мазкур фильм сценарийси жуда таъсирли чиққани сабабли хонанда бу сафар истисно тариқасида кичик эпизодда иштирок этишга рози бўлган. У бунга бир йилдан сўнг, қандай қилиб розилик билдирганини ҳам очиқлади:
«Режиссёр: “Бу фильмга тушмасангиз бўлмайди. Чунки фильм сценарийси айнан шу қўшиқдан келиб чиққан. Бизга воқеалар ривожи, сюжет ғояси айнан қўшиқдаги мазмун туртки бўлди. Шундан кейин сценарий ёздим. Шунинг учун илтимос, ҳеч бўлмаганда кичкинагина рол ўйнаб беринг”, деб тушунтирди. Мен ҳам буни тушундим ва рози бўлдим. Фильм менга жуда ёқди, ҳатто кўриб йиғладим», — дея изоҳ берди хонанда.
“Zamin”ни Telegram'да ўқинг!
