Ўзбекистон футзал федерацияси Польша футбол федерацияси билан ҳамкорлик қилади

Бугун Ўзбекистон футзал федерацияси президенти Бекзод Маматқулов Варшава шаҳрида Польша футбол федерацияси вице-президенти Адам Казмерчяк билан учрашди.

Ўзбекистоннинг Польшадаги фавқулодда ва мухтор элчиси Амирсаид Аъзамхўжаев ҳамроҳлик қилган учрашув давомида ҳар икки мамлакат футболи ва футзали раҳбарлари Ўзбекистон футбол ассоциацияси ҳамда мамлакатимиз футзал федерацияси ва Польша футбол федерацияси ўртасида дўстона алоқаларни ўрнатиш, кўплаб йўналишлар бўйича ҳамкорликни йўлга қўйиш борасида келишиб олишди.

Шунингдек, Бекзод Маматқулов ва Адам Казмерчяк ҳар икки мамлакат U-18 ва U-20 ёш тоифасидаги терма жамоаларни ҳамда Ўзбекистонда аёллар футзалини ривожлантириш бўйича самарали ҳамкорлик қилиш борасида келишиб олишди. Жумладан, куз фаслида Ўзбекистон ва Польшанинг ҳам эркаклар, ҳам аёллар терма жамоалари иштирокида ўртоқлик учрашувлари ташкил этиш борасида қарор қабул қилинди.

Учрашув сўнгида Адам Казмерчяк меҳмонларга жаҳон футболи юлдузи, Польша миллий терма жамоаси сардори Роберт Левандовскининг дастхати туширилган махсус футболкани тақдим этди.

Манба: Ўзбекистон футзал федерацияси матбуот хизмати «Замин»ни Telegram’да ўқинг!