Гвардиола Абдуқодир Ҳусановнинг асосий камчилигини айтди!

Ўзбекистон миллий терма жамоаси марказий ҳимоячиси Абдуқодир Ҳусанов энди Англия футболини ҳам забт этмоқда ва тобора ўзини англиялик мухлису мутахассисларга яхшироқ танитиб боряпти.

Тез кунларда 21 ёшга тўладиган ҳамюртимиз “Манчестер Сити”нинг асосий ўйинчилари қаторига қўшилди ва таҳлилчиларнинг таъкидлашича, айнан ўзбек футболчиси яқин келажакда жамоанинг ҳимоя қўрғонида етакчиликни ўз қўлига олади.

Абдуқодир Ҳусанов жамоага янада чуқурроқ сингиши учун инглиз тилини тезроқ ўзлаштиришига тўғри келади. Жамоа бош мураббийи Хосер Гвардиола ҳам ўзбек футболчисининг мулоқот доираси чекланганини алоҳида тилга олиб ўтди.

- Январда сафимизга қўшилган ўйинчиларнинг бари машғулотларда ўзларини яхши томондан кўрсатиб келмоқда.

Абдуқодир Ҳусанов қисқа фурсат ичида “Челси”, “Лейтон Ориент”, “Ньюкасл”, “Реал”, “Ливерпуль” каби жамоаларга қарши ўтказилган учрашувларда иштирок этди. Бу футболчи қаердан келганини инобатга олсак, у ҳали бунақа тиғиз тақвимда ўйнамаган.

Яна бир жиҳати шундаки, Ҳусанов ҳали инглиз тилида эркин гаплаша олмайди ва бу атрофдагилар билан мулоқотнинг камлигига сабаб бўляпти.

Бироқ унинг ўйинга қўшаётган ҳиссаси улкан эканини эътироф этиш керак.

Умар Мармуш ва Нико Гонсалес сал кам ўйнаган бўлса-да, жуда яхши ҳаракат қилмоқда. Биз бу уч футболчининг жамоамиз ўйинига кўрсатаётган таъсиридан қониқиш ҳосил қиляпмиз. Ва албатта, вақти келиб, Витор Рейс ҳам яхши даражага чиқиши билан ўйин амалиётига эга бўлади, - деди “Манчестер Сити” бош мураббийи Хосеп Гвардиола.

Ўз навбатида, турли лигаларда Абдуқодир Ҳусанов фаолиятига ҳавас қиладиган футболчилар ҳам кўпаймоқда. Хусусан, Россиянинг “Арсенал” клубида ўйнаётган асли конголик бўлган марказий ҳимоячи Эрвинг Ботака-Йобома ўзбек футболчиси сингари Европа футболини забт этишни орзу қилаётганини яширмади.

- Европа чемпионатлари ҳам турлича бўлади. Мисол тариқасида Бельгияни оладиган бўлсак, мен бу чемпионатга борган бўлардим. Ҳис-туйғуларим бу лига менга тўғри келиши ва ёқишидан далолат беряпти. Чунки бундай лигалардан катта чемпионатларга кўп ўйинчи олишади.

Масалан, Абдуқодир Ҳусанов олайлик: яқинда Россия биринчи лигасидан кучли бўлмаган Беларусь чемпионатида ўйнаб юрганди. Кейин Франциянинг “Ланс” клубига ўтди. Ҳозир “Манчестер Сити”да!

Ҳамма нарса бўлиши мумкин экан. Ҳамманинг ўз тақдири бор, фақат ривожланиш йўлини тўғри танлай олиш лозим, - деди Эрвинг Ботака-Йобома.

Таъкидлаш жоизки, профессионал футболчилик фаолиятини 2022 йили бошлаган Абдуқодир Ҳусановнинг жаҳоннинг энг кучли клубларидан ҳисобланган “Манчестер Сити” даражасидаги футболчига айланишига қисқа фурсат – икки ярим йил кифоя қилди холос. Дастлаб бир йил Беларусь чемпионатида “Энергетик-БГУ” шарафини ҳимоя қилган ҳамюртимиз кейин “Ланс”да бир ярим мавсум ўйнади.

“Манчестер Сити” ўзбек футболчисини қўлга киритиш учун бонусларни қўшиб ҳисоблаганда 50 миллион евро харажат қилди. Бу Ўзбекистон футболи тарихи ва “Ланс” клуби фаолияти давомидаги энг йирик трансфер бўлди ва рекорд сифатида қайд этилди. “Замин” янгиликларини “Telegram”да кузатиб боринг