Аббосбек Файзуллаев: ЦСКАнинг ёрқин юлдузига нималар халал беряпти?

2023 йил август ойида “Пахтакор” клубидан Москва ЦСКАсига кўчиб ўтган Аббосбек Файзуллаев қисқа вақт ичида жамоанинг етакчи ўйинчиларидан бирига айланган эди. Ёш ва иқтидорли легионеримиз Россия Премьер-лигасининг энг кучли кашфиётларидан бири сифатида эътироф қилинди.

Жорий мавсумнинг биринчи қисмида 21 ёшли Файзуллаев ЦСКА сафидаги ўйинларда муҳим футболчи сифатида майдонга тушган бўлса-да, қишки танаффусдан кейин жамоа бош мураббийи Марко Николич тактикада жиддий ўзгаришларга қўл урди.

Бу ўзгаришлар Аббосбекка катта таъсир кўрсатди. Майдондаги вазифалари кескин ошди, унинг асосий ўйин амплуаси ҳам ўзгарди. Ҳозир Аббос янги ролга мослашиш жараёнини бошдан кечирмоқда ва бу унинг ўйинидаги сезиларли пасайишга сабаб бўлди.

Россия футболининг экспертлари ҳамюртимизнинг вазияти ҳақида ўз мулоҳазаларини билдирди.

ЦСКАнинг собиқ ҳимоячиси Владимир Пономарёвнинг таъкидлашича, Аббосбек сўнгги пайтларда жисмоний жиҳатдан муаммоларга дуч келяпти:

«Аббосбек Файзуллаевда жисмоний тайёргарлик билан боғлиқ қийинчиликлар пайдо бўлди. У ҳали жуда ёш – атиги 21 ёшда. У нафақат жисмонан, балки руҳан ҳам чарчаган. Уни бошида жуда кўп мақташди, ҳатто “Реал” даражасидаги футболчига чиқариб қўйишди.

Ёш ўйинчилар билан жуда эҳтиёткор бўлиш керак. Улар кўп мақтовни эмас, балки ўз хатоларини кўришни ўрганишлари лозим. Аббосбекка ҳам ҳозир ортиқча юклама бериб юбормоқда. Уни жамоада марказий фигура қилиб қўймаслик керак эди. Ўзига келишига бироз вақт бериш зарур. Шундагина у яна ўз даражасига қайта олади».

ЦСКАнинг яна бир собиқ футболчиси Александр Гришин ҳам Аббосбекнинг ўйинидаги ўзгаришлар ҳақида фикр билдирди:

«Аббосбек Файзуллаевнинг асосий позицияси қанот ҳужумчиси. У қанотда ўзини жуда эркин ҳис қилади. Аммо ҳозир ЦСКА унинг позициясини ўзгартириб, вазифаларини қийинлаштириб юборди. Шунинг учун ҳам Аббосбек майдонда кўринмай қоляпти. Илгари унинг ўйини эркин эди».

Аббосбек Файзуллаев бу мавсумда Россия Премьер-лигаси ва мамлакат кубоги доирасида жами 32 та учрашувда майдонга тушиб, 3 та гол урди ва 7 та голли узатма амалга оширди. «Замин»ни Telegram’да ўқинг!