Бектемир Мелиқўзиев АҚШда америкалик енгилмас боксчи билан жанг қилади

Профессионал боксда мамлакатимиз шарафини муносиб ҳимоя қилиб келаётган Бектемир Мелиқўзиевнинг навбатдаги рақиби маълум бўлди. Ўзбек боксчисининг кейинги жанги АҚШнинг Лас-Вегас шаҳридаги машҳур «Virgin Hotels» аренасида бўлиб ўтади. Бу ҳақда BoxingScene нашри хабар тарқатди.

Мазкур жанг жорий йилнинг 30 май кунига белгиланган бўлиб, унда Мелиқўзиевга америкалик кучли ва мағлубиятсиз боксчи Дариус Фулгум рақиблик қилади. Фулгум шу пайтгача профессионал рингда 14 маротаба жанг қилиб, уларнинг барчасида ғалаба қозонган ва 12 рақибини нокаут билан мағлубиятга учратган.

Бектемир Мелиқўзиев эса ўзининг охирги жангини 2024 йил ноябрь ойида америкалик Дэвид Стивенсга қарши ўтказган ва ҳакамлар қарорига кўра зафар қучган эди. Айни пайтгача Мелиқўзиев профессионал рингда 16 марта жанг қилиб, уларнинг 15 тасида ғолиб чиққан. Ушбу ғалабалардан 10 тасини нокаут билан якунлаган. Бектемир фақат бир мартагина мағлуб бўлган.

Дариус Фулгум охирги марта жорий йилнинг февраль ойида ўз ҳамюрти Винфред Харрис-Жуниор билан тўқнаш келиб, жангнинг 4-раундида рақибини нокаутга учратган эди.

Маълумот учун, ушбу тўқнашув икки боксчи учун ҳам ўта муҳим аҳамиятга эга бўлиб, ғолиб бўлган спортчи ўз вазн тоифасида чемпионлик камари учун жанг қилишга янада яқинлашади. Ўзбекистонлик ишқибозлар Мелиқўзиевдан бу сафар ҳам ёрқин ғалаба кутишмоқда. «Замин»ни Telegram’да ўқинг!