«Барселона» янги формада: рэп юлдузи Трэвис Скоттнинг бренди «Эл-класико»да тақдим этилади!

Испания Ла Лигасининг 35-туридан ўрин олган, футбол мухлислари орзиқиб кутаётган марказий баҳс – «Эл-класико»да «Барселона» клуби футболчилари ўз мухлислари учун махсус сюрприз тайёрлади.

Бу сафар каталонияликлар Мадриднинг «Реал» жамоасига қарши баҳсда машҳур Америка рэп юлдузи Трэвис Скоттнинг шахсий бренди – «Cactus Jack» логотипи акс этган эксклюзив футболкада майдонга тушишади. Бу ҳақда клубнинг расмий матбуот хизмати маълум қилди.

Ушбу оригинал ҳамкорлик фақат эркаклар жамоаси билан чекланиб қолмайди. «Барселона»нинг аёллар жамоаси ҳам Лига Феменина чемпионати 30-тур доирасида худди шу махсус формада ўйин ўтказади.

Эътиборлиси, Каталония клуби сўнгги йилларда «Spotify» билан ҳамкорликда мунтазам равишда шунга ўхшаш креатив акцияларни амалга ошириб келади. Бунга қадар, «Барселона» футболчилари «Coldplay», «Karol G», «The Rolling Stones», «Rosalía» ва «Drake» каби дунёга машҳур мусиқачиларнинг бренди туширилган футболкаларда майдонга тушиб, мухлисларга катта таассурот қолдиришган эди.

Шунингдек, клуб бу каби ноёб ҳамкорлик орқали жамоанинг халқаро майдондаги нуфузини ошириш ва ёш аудиториянинг диққатини жалб қилишни мақсад қилган. Бу йилги форма эса, шубҳасиз, футбол мухлислари ва рэп санъати ихлосмандлари ўртасидаги қизиқишни янада оширади.

Ушбу махсус формалар фақат чекланган миқдорда ишлаб чиқарилади ва жамоанинг расмий дўконларида сотувга чиқарилади.

Каталонияликларнинг янги либосда қандай натижа кўрсатиши катта қизиқиш уйғотмоқда. «Барселона» ва «Реал» ўртасидаги мазкур муҳим ўйин кўп миллионли мухлислар аудиториясини телевизор экранлари олдига тўплайди. Учрашув дунё футболидаги энг муҳим баҳслардан бири сифатида тарихда қолиши шубҳасиз.

Футбол ва мусиқа оламининг ноёб уйғунлигидан баҳраманд бўлишни истаган мухлислар учун ушбу ўйин ҳақиқий байрамга айланиши мумкин. «Замин»ни Telegram’да ўқинг!