А Серияда мавсумнинг энг яхши мураббийи маълум бўлди – Клаудио Раньери “Рома”ни қайта жонлантирди

Италия А Сериясининг 2024-2025 йилги мавсумини диққат билан кузатиб келаётган футбол ишқибозлари сўровномада мавсумнинг энг яхши мураббийини аниқлаб беришди. Унга кўра, овоз берган мухлисларнинг 58 фоизи “Рома”ни бошқараётган тажрибали мутахассис Клаудио Раньерини энг яхши мураббий деб топди.

“Рома” клуби раҳбарияти мавсум бошида жамоа натижаларидан қониқиш ҳосил қилмаган эди. Шу сабабли, клуб ноябрь ойида катта тажрибага эга бўлган, бир вақтлар ўз фаолиятини якунлаганини эълон қилган Клаудио Раньерини жамоа бошқарувига қайтаришга қарор қилди.

Эслатиб ўтамиз, 73 ёшли италиялик мутахассис ўтган мавсум “Кальяри” клубини юқори дивизионда сақлаб қолишда муҳим роль ўйнаганидан сўнг, фақат ўзи учун қадрдон бўлган “Рома”дан таклиф бўлган тақдирдагина фаолиятини қайта тиклашини билдирган эди. Бу воқеа ҳақиқатга айланди ва Раньерининг жамоага қайтиши римликлар учун катта омадли бурилиш нуқтаси бўлди.

Раньерининг раҳбарлиги остида “Рома” турнир жадвалининг иккинчи ярмидан юқори ўринлар учун жиддий рақобатга кириша бошлади. Айниқса, ўзбекистонлик ҳужумчи Элдор Шомуродов жамоанинг етакчи фигураларидан бирига айланиб, ажойиб ўйинлари билан ҳам жамоаси, ҳам мухлисларнинг меҳрини қозонди.

Шомуродов, хусусан, “Рома”нинг сўнгги бешта учрашувидан тўрттасида ҳар бир баҳсда иккитадан гол уриб, шунингдек, голли узатмаларни амалга ошириб, жамоага ғалабаларни тақдим этди. Элдорнинг бу ҳаракатлари туфайли “Рома” жадвалда анча юқори ўринларга кўтарилиб, Чемпионлар лигаси йўлланмаси учун курашда фаол иштирок этмоқда.

Клаудио Раньери ва унинг жамоаси мавсум якунига қадар юқори натижалар қайд этиш орқали А Серияда яна бир ажойиб ҳикояни ёзишга интилмоқда. «Замин»ни Telegram’да ўқинг!