БАА собиқ мураббийи: Косминда Ўзбекистонни енгиш салоҳияти бор

БАА миллий терма жамоасининг собиқ бош мураббийи доктор Абдуллоҳ Мисфер 2026 йилги Жаҳон чемпионати саралаш босқичида ўзбекистонлик рақиб устидан ғалаба қозониш учун жамоанинг барча зарур имконият ва ресурсларга эга эканлигини таъкидлади. Бу ҳақда у Emirates Today нашрига берган интервьюсида фикр билдирди.

Косминга ишонч баланд, жамоада куч бор

Мисфернинг фикрича, ҳозирги бош мураббий Космин Олариу терма жамоанинг ички муҳити ва ўйинчилар салоҳиятини яхши билади, бу эса унинг бошқа мураббийлардан устунлигини таъминлайди. “У футболчиларни фақат майдонда эмас, руҳий жиҳатдан ҳам теран тушунади”, – дейди Мисфер.

Мудофаа хатолари унутилмаслиги керак

Шу билан бирга, у Тошкентда ўтган биринчи ўйиндаги (0:1) мағлубият сабабларини ҳам эсга олди. Унга кўра, ҳимоя чизиғидаги камчиликлар таҳлил қилиниши ва бу сафар бартараф этилиши лозим.

“Энди имкониятни бой беришга ҳаққимиз йўқ”

“Жаҳон чемпионати йўлланмаси учун курашда БААнинг энди ҳеч қандай хатога йўл қўйишга ҳаққи йўқ. Жамоа фақат ғалаба учун ҳаракат қилиши шарт: Ўзбекистон ва Қирғизистон устидан ғалаба қозониш — мажбурий вазифа. Шунингдек, Қатар — Ўзбекистон баҳсида қозоғистонликлар ғалаба қозонишига ҳам умид боғланиши мумкин”, — деди Мисфер.

Жамоада рақобат кучайган

Собиқ мураббийнинг айтишича, Космин томонидан чақирилган футболчилар яхши жисмоний ҳолатда ва асосий таркиб учун рақобат кучайган. Бу ички рақобат ўйин сифатига ижобий таъсир кўрсатиши мумкин. Ҳужум ва ҳимоя ўртасидаги мувозанатни сақлаб қолиш эса муваффақият учун калит омиллардан бири бўлади.

Абдуллоҳ Мисфернинг баёнотидан келиб чиқадиган хулоса шундай: БАА терма жамоаси бош мураббийи ва футболчилари ҳозирда етарли ресурс, тайёргарлик ва ишончга эга. Бўлажак беллашув – фақат тактик мувозанат, психологик барқарорлик ва майдондаги содиқлик масаласидир.

Эслатиб ўтамиз, БАА – Ўзбекистон ўйини 5 июнь куни, Тошкент вақти билан соат 21:00 да старт олади. Ушбу беллашув ҳар икки жамоа учун Жаҳон чемпионати сари ҳал қилувчи босқич бўлади.