"Орзу рўёбга чиқди: Ўзбекистон қаҳрамонларини Тошкентда катта тантана билан кутиб олишди!"

Ўзбекистон миллий терма жамоаси ФИФА Жаҳон чемпионати йўлланмасини тарихда илк бор қўлга киритиб, халқимизга катта шодлик ва ғурур бағишлади. Жамоамиз Бирлашган Араб Амирликларида бўлиб ўтган ҳал қилувчи учрашувдан кейин Тошкентга қайтиб келди. Юртдошларимиз чемпионларимизни қарши олиш учун Тошкент аэропортига эрталабданоқ йиғилишган эди.

Самолёт заминга қўнган пайтда миллий жамоамизни кутиб олиш учун махсус тантанали тадбир ташкил этилди. Қизил гилам ёйилган, давлатимиз байроқлари жилваланган аэропортда футболчиларимизни Ўзбекистон Бош вазири Абдулла Арипов, Ўзбекистон футбол ассоциацияси президенти Баҳодир Қурбонов ва бошқа юқори мартабали раҳбарлар қучоқ очиб, илиқ сўзлар билан кутиб олишди.

Самолётдан тушган футболчилар ва жамоа бош мураббийи Темур Кападзега гулдасталар тақдим этилди. Ҳар бир ўйинчига алоҳида эътибор кўрсатилиб, уларнинг юксак натижалари учун миннатдорчилик билдирилди. Терма жамоамиз аъзолари юртдошларимизнинг қўллаб-қувватлашидан хурсанд бўлиб, чин дилдан ташаккур айтишди.

Президентимиз Шавкат Мирзиёев тарихий натижани қўлга киритган терма жамоа аъзоларига "Ўзбекистон Ифтихори" унвонини беришга қарор қилди. Шунингдек, футболчиларимизга давлатимиз раҳбарининг махсус совғаси сифатида BYD Champion русумли автомобиллар тақдим этилади.

Тантанали кутиб олиш тадбиридан сўнг жамоа аъзолари аэропортда ОАВ ва мухлислар билан учрашди. Жамоанинг етакчилари, мураббий Темур Кападзе ва сардор Элдор Шомуродов ўз фикр-мулоҳазаларини билдириб, халқимиз ва юртбошимизга кўрсатилган эътибор ва ишонч учун алоҳида миннатдорлик билдиришди.

Бу тарихий ютуқ юртимиз футболидаги янги босқичнинг бошланиши бўлиб, Ўзбекистоннинг халқаро майдондаги обрўсини янада оширишга хизмат қилади. Миллий жамоамизнинг ушбу буюк ғалабаси барчамизга муборак бўлсин!