Россия футбол иттифоқи Эксперт-судия комиссияси "Спартак" жамоасининг сўрови асосида "Спартак" ва "Балтика" жамоалари ўртасидаги учрашувдаги икки ҳолатни кўриб чиқди. Бу ҳақида one.uz хабар берди.
Мазкур ҳолатлар Антон Заболотнийнинг ва Маркинёснинг майдондан четлатилиши билан боғлиқ. Биринчи ҳолатда Эксперт-судя комиссияси ҳакам Сергей Карасёвнинг ВАР тизими аралашувидан кейин қабул қилган қарорини тўғри деб топди.
Комиссия Антон Заболотнийнинг футбол қоидаларини жиддий равишда бузганини аниқлади. Ҳакамлар бир овоздан "Спартак" ҳужумчиси тўпга етиб бормасдан, очиқ крассовкалари билан рақиб футболчининг хавфсизлигига таҳдид солганини таъкидладилар.
Иккинчи ҳолатда эса комиссия бир овоздан Сергей Карасёв томонидан Маркинёсга иккинчи сариқ карточка кўрсатилганини хато, деб топди. Комиссия аниқлашича, қоидабузарлик содир этилганидан аввал "Балтика" футболчиси офсайд ҳолатида бўлган.
Шу сабабли ҳужум ривожланишига тўсқинлик қилинмаган. Натижада ён ҳакамнинг хатоси асосий ҳакамнинг ҳам хато қарор қабул қилишига олиб келган.
ВАР эса ўз протоколига кўра бу вазиятда аралаша олмаган. Эслатиб ўтамиз, "Спартак" ушбу ўйинда "Балтика"га 0:3 ҳисобида мағлуб бўлди.
«Замин»ни Telegram’да ўқинг!
