Суперлиганинг 19-туридан ўрин олган дерби — “Навбаҳор” ва “Нефтчи” жамоалари ўртасидаги баҳс (0:1) якунига етгач, наманганликлар бош мураббийи Сергей Лушчан матбуот анжуманида иштирок этиб, учрашув ва жамоа ҳолати ҳақида батафсил тўхталиб ўтди.
— Бугун майдонда ҳақиқий кураш кечди. Дерби ўз номи билан дерби бўлди. Биринчи бўлимда рақиб катта устунликка эга чиқди, биз эса ҳужумда деярли ҳеч нарса қила олмадик. Ўйин бир гол билан ҳал бўлиши кутилганди — ким хато қилса, ўша мағлуб бўлиши эҳтимоли катта эди. Ачинарлиси, бу хатога биз йўл қўйдик. Дарвозабонимизни айблай олмайман, чунки зарба жуда кучли чиқди. Бундай гўзал голлар футболда доим учраб туради. “Нефтчи”ни ғалаба билан табриклайман — уларнинг таркиби ҳозир биздан кучлироқ, — деди Лушчан.
Мураббийдан “Навбаҳор” ўз ўйинини кўрсатишига нималар халақит берди?” деган саволга у шундай жавоб қайтарди:
— Энг аввало рақиб халақит берди. Футболда хатоларсиз баҳс бўлмайди, биз ҳам, рақиб ҳам хатоларга йўл қўйдик. Лекин тақдирни битта гол ҳал қилди. “Андижон”га қарши ўйинимиз мисолида кўриш мумкин: 0:0 тугаши ҳам эҳтимол эди, аммо биз битта зарба билан ғалабани таъминладик. Футбол ана шундай ўйин.
Жамоанинг мавсум якунидаги мақсадлари ҳақида Лушчан очиқ сўзлади:
— Мен башоратчи эмасман. Ишни тўхтатганимиз йўқ, меҳнат қиляпмиз. Лекин муаммоларимиз бор, балки улар бошқаларга нисбатан кўпроқдир. Январда йиғин бошлаганимизда фақат битта футболчи бор эди. Ҳар қандай мураббийга беш ойда тўлиқ жамоа тузиш осон эмас. Гвардиола мисолида кўрасиз: “Манчестер Сити” учун 1,5 миллиард сарфланди, шунда ҳам учинчи мавсумга келиб чемпионликни қўлга киритишди. Бизда эса бундай имкониятлар йўқ. Шундай бўлса-да, 2027 йилгача чемпионлик ва Кубок учун курашиш вазифасини олдимизга қўйганмиз. Бунинг учун барча омиллар уйғун бўлиши шарт.
Мағлубиятдан кейин дарвозабон билан суҳбати ҳақида ҳам мураббий фикр билдирди:
— Унга руҳий қўллаб-қувватлаш бердик. Хатолар бўлади, бу футболнинг бир қисми. У яхши посбон, бундан шубҳа йўқ. Энди асосий эътиборни Кубок баҳсига қаратишимиз лозим.
Анжуманда стандарт вазиятлар ҳақида ҳам савол берилди:
— Бизда Жиянов, Комилов каби стандартларни маҳорат билан ижро этадиган футболчилар бор. Замонавий футболда стандарт вазиятлар ҳал қилувчи аҳамиятга эга. Бугун ҳам ҳаракат қилдик, аммо натижа бермади. Суперлигада ҳозир осон ўйин қолмади — барча жамоалар юксак савияда ўйнаяпти. Биз хатоларни таҳлил қиламиз ва ишда давом этамиз, — дея баёнот берди Лушчан.
Хулоса қилиб айтганда, “Навбаҳор” дербида мағлуб бўлса-да, Лушчаннинг сўзларидан жамоа руҳан тушмагани ва келгуси баҳсларга тайёргарликни жиддий олиб бораётганини англаш мумкин. Мураббийнинг энг катта шиори эса аниқ: мағлубиятдан тўғри хулоса чиқариш ва олдинга қараш.
Манба: championat.asia
«Замин»ни Telegram’да ўқинг!
