Ўзбекистон миллий терма жамоасида бош мураббий алмашиши эҳтимоли ҳақида хабарлар тарқалиши футбол жамоатчилигида қизғин муҳокамаларга сабаб бўлди. Айниқса, Жаҳон чемпионатига бор-йўғи бир йилдан кам вақт қолган бир пайтда бундай масала кўтарилиши кўплаб саволларни туғдирмоқда.
Шу муносабат билан, россиялик таниқли мутахассис Станислав Черчесов ўз қарашлари билан бўлишди.
«Ростини айтсам, бу масала ҳақида иккинчи марта эшитяпман ва ҳайратдаман. Нима учун мураббийни алмаштириш ғояси пайдо бўлганини ҳам, қанчалик ҳақиқатга яқинлигини ҳам билмайман. Менинг назаримда, терма жамоани Олимпиадага ва Жаҳон чемпионатига олиб чиққан Тимур Кападзе ҳурмат ва ишончга муносиб. У шунгача катта мусобақаларда ишламаган бўлса-да, жамоани ушбу босқичга олиб чиқди. Бунинг ўзи катта ютуқ. Кўриб турганимдек, жамоа ўйинда ҳужумкор услубда ҳаракат қилади ва майдонда нимани амалга оширишни яхши билади. Шу сабабли, менимча, йўлланмани қўлга киритган мураббий жамоани охиригача бошқариши керак», — деди Черчесов.
Унинг фикрича, хориждан мураббий олиб келиш — жуда мураккаб жараён. «Яқинда Қозоғистонда ишлаганимда, тилда қийинчилик бўлмади, рус тилида мулоқот қилардик. Лекин барибир, менталитет, жамоа ичидаги муҳит, ҳар бир ўйинчи кимлигини англаш учун вақт керак бўлади. Ўзбекистонни умуман билмайдиган, у ерда ҳеч қачон бўлмаган мутахассис дарҳол самара бериши жуда қийин. Шу жиҳатни раҳбарият ҳам ҳисобга олиши шарт», — дея қўшимча қилди у.
Россиялик мутахассис шунингдек, футболчи ёки мураббий ҳар доим қаерга келаётганини, қандай маданият ва қандай муҳитда ишлаши кераклигини англаб етиши шартлигини таъкидлади.
«Менинг фикрим аниқ: Кападзега ишонч билдириш керак. Тимур жамоа билан ишини давом эттириши лозим. Агар мендан маслаҳат сўралса, ҳаммаси ўз йўлида кетиши керак», — деб хулоса қилди Черчесов.
Манба: Championat.asia
«Замин»ни Telegram’да ўқинг!
