Англиянинг Ливерпуль шаҳрида ўтаётган бокс бўйича жаҳон чемпионатида ярим финал беллашувлари қизғин паллага кирди. Миллий термамиз номидан 60 килограмм вазн тоифасида рингга кўтарилган маҳоратли йигитимиз Абдумалик Халоков финал йўлланмаси учун япониялик рақиби Шунсуке Китамотога қарши тиш-тирноқ билан кураш олиб борди.
Жангнинг дастлабки раундиёқ юртимиз вакилининг устунлиги билан бошланди. Ҳар бир ҳакам Халоковнинг кучли зарбаларини ва устун ҳаракатини баҳолаб, биринчи бўлимда унга ғалаба очколарини берди. Шу ҳолатда япон боксчиси қанча ҳаракат қилмасин, Абдумаликнинг тажрибаси ва техникаси олдида заиф кўринарди.
Аммо иккинчи раунд ўрталарида воқеалар кутилмаган йўналиш олди — Халоковнинг пешонаси ёрилди. Қон оқиши ортиб боргани учун рингга шифокор чақирилди ва у хавфни инобатга олиб, жангни тўхтатишга қарор қилди. Шунга қарамай, икки раунд якунлари асосида ҳакамлар якдил қарор чиқаришди: натижа 5:0 ҳисобида юртимиз вакили фойдасига қайд этилди (20:18, 20:18, 20:18, 20:18, 20:18).
Шу тариқа, оғир ва кескин кечган беллашувда Халоков мардонавор ҳаракат қилиб, ўз номини финал йўлланмасига ёздирди. Энди у мамлакатимиз учун ҳал қилувчи жангда олтин медаль учун баҳс олиб боради.
«Замин»ни Telegram’да ўқинг!
