Собиқ элита ҳакамларидан бири Альфонсо Перес Бурруль «Реал Мадрид» ва «Марсел» жамоалари ўртасидаги Чемпионлар Лигаси баҳсида белгиланган иккинчи пенальти ҳақида ўз муносабатини билдирди. Унинг сўзларига кўра, мазкур эпизодда ҳимоячига нисбатан жуда оғир қарор чиқарилган ва пенальти тайинланиши ўринсиз бўлган.
Эслатиб ўтамиз, биринчи турда ўтказилган ушбу кескин учрашув 1:2 ҳисобида «Реал» фойдасига якунланди. Мадридликларнинг икки голини ҳам Килиан Мбаппе пенальтидан киритди ва ҳеч бирида адашмади. Шунингдек, 79-дақиқадаги вазият кенг муҳокамаларга сабаб бўлди. Ҳолатда «Марсел» ҳимоячиси Факундо Медина «подкат» орқали Винисиусдан тўпни олишга ҳаракат қилган, аммо шу пайтда тўп унинг қўлига тегиб кетди. Бош ҳакам Ирфан Пельто бу ҳаракатни қўл қоидаси сифатида баҳолаб, 11 метрлик жарима тўпини белгилади.
Бироқ Буррул бу қарорга қўшилмади:
«Менимча, бу вазият табиий ҳаракат эди. Ҳимоячи йиқилди ва қўлини ҳимоя қилиш учун қўйди. Унинг тўпга қасддан ҳаракат қилмагани аниқ. Шу сабабли, бу ерда пенальти тайинланиши нотўғри бўлган», – деди у журналистларга.
Буррулнинг бу фикри футбол мухлислари орасида ҳам қизғин баҳсларга олиб келди. Айримлар ҳакамнинг қарорини ҳимоя қилса, бошқалар собиқ ҳакамнинг фикрига қўшилиб, «Марсел»га нисбатан адолатсизлик қилинганини таъкидламоқда.
Кўпчиликка маълумки, «Реал» каби катта клуб иштирок этган ўйинларда ҳар қандай баҳсли эпизод катта муҳокамаларга сабаб бўлади. Бу сафар ҳам истисно бўлмади.
Кутилмоқдаки, ушбу ҳолат ҳақида УЕФА экспертлари ҳам ўз хулосасини билдириши мумкин. Шу билан бирга, «Марсел» ишқибозлари бу баҳсли қарорга норозилик билдириб, жамоага жиддий таъсир қилганини айтишмоқда.
Бу баҳс узоққа чўзилиши эҳтимолдан холи эмас, аммо бир нарса аниқ – Чемпионлар Лигаси мусобақасида ҳар бир қарор нафақат ўйин тақдири, балки бутун гуруҳ натижаларига ҳам таъсир кўрсатиши мумкин.
«Замин»ни Telegram’да ўқинг!
