Супероғир вазн тоифасидаги юртдошимиз мухлисларни қувонтирди: Баҳодир Жалолов Россиядаги илк профессионал жангини зафар билан якунлади. Санкт-Петербургда ўтаётган “IBA Pro 10” турнирининг марказий баҳсида у мезбон боксчи Виталий Кудухов (7–3, 3 КО)га қарши рингга чиқиб, 8 раунд давом этган шиддатли тўқнашувда ҳакамлар қарорига кўра очколарда устун келди.
Жанг давомида Жалолов анъанавий равишда масофани назорат қилди, джеб ва тўғри зарбалар билан рақибнинг ҳужумларини сўндириб, ўз устунлигини босқичма-босқич мустаҳкамлади. Кудуховнинг фаол қарши ҳаракатларига қарамай, ҳал қилувчи пайтларда ташаббус Баҳодирда бўлди ва у асосий эпизодларда аниқлик ҳамда сабр-бардош намоён этди.
Шу тариқа, 31 ёшли чармқўлқоп устаси профессионал фаолиятидаги 16-жангида 16-ғалабасини қўлга киритди (уларнинг 14 таси — муддатидан аввал). Эслатиб ўтамиз, Жалолов сўнгги марта апрел ойида Қозоғистонда украиналик Игор Шевадзутскийни ҳам ҳакамлар қароригa кўра енгган эди.
Россиядаги дебютни ишончли ғалаба билан бошлаган Олимпия чемпиони энди навбатдаги қадамларини ташлашини эълон қилиши кутиляпти. Мутасаддилар ва мухлислар унинг рейтинг поғоналарида яна юқорига сузишини, катта титуллар йўлидаги навбатдаги синовларга тайёр туришини кутишмоқда.
“Zamin”ни Telegram'да ўқинг!
