Ўзбекистон миллий терма жамоаси бош мураббийи Фабио Каннавaро ўз ишини халқаро даражадаги профессионаллар билан бирга олиб бормоқда. Италиялик мутахассис ўзининг ишончли ва тажрибали мураббийлар штаби билан миллий жамоа салоҳиятини янги босқичга олиб чиқишни мақсад қилган. Ҳар бир аъзо ўз соҳасида улкан тажрибага эга ва жамоага янги ғоялар, замонавий ёндашув ҳамда Европа стандартидаги иш услубини олиб кирмоқда.
Эуженио Албарелла — жисмоний тайёргарлик бўйича мураббий
1965 йилда Италиянинг Неаполь шаҳрида таваллуд топган Эуженио Албарелла футбол оламида юқори малакали фитнес мутахассиси сифатида танилган. 2010 йилда у Италиянинг “Ювентус” клубида иш бошлаган, бир йил ўтиб эса машҳур мураббий Алберто Заккерони раҳбарлигида Япония терма жамоаси билан Осиё кубогини қўлга киритган.
2016 йилда у Хитойнинг “Бейжинг Гоан” клубида ишлаган, айнан ўша пайтда ўзбекистонлик ҳимоячи Егор Кримец ҳам жамоа шарафини ҳимоя қилган. Кейинчалик Албарелла Фабио Каннавaро билан бирга “Удинезе” ҳамда “Динамо Загреб” клубларида фаолият юритган. Унинг соғлом тайёргарлик методикаси Европада юқори баҳоланади.
Антонио Кименти — дарвозабонлар мураббийи
1970 йил 30 июнда Италиянинг Бари шаҳрида туғилган Антонио Кименти — собиқ профессионал дарвозабон. У “Рома”, “Лечче”, “Кальяри”, “Удинезе” ва “Ювентус” каби клубларда тўп сурган. “Ювентус”да у афсонавий Жанлуижи Буффоннинг ортида иккинчи рақамли кипер сифатида танилган.
Мураббийлик фаолиятини у “Ювентус” ёшлар жамоасидан бошлаб, кейин “СПАЛ”, “Сампдория” ва Италия U-21 терма жамоасида ишлаган. Кименти нафақат тажрибали мураббий, балки ёш дарвозабонларни руҳий ва тактик жиҳатдан етиштиришда катта салоҳиятга эга мутахассис сифатида тан олинган.
Франческо Тройзе — Каннавaронинг ёрдамчиси
1972 йил 5 февралда Неаполда туғилган Франческо Тройзе УЕФАнинг А тоифали лицензиясига эга бўлиб, 2013 йилдан буён халқаро клубларда фаолият юритиб келади. Футболчилик фаолиятини “Наполи” ёшлар жамоасидан бошлаган Тройзе кейинчалик “Казеле” ва “Потенца” клубларида тўп сурган.
Мураббийлик карьерасини у Жузеппе Саннино ёнида “Кьево” ва “Уотфорд” жамоаларида бошлаган, кейин “Катания”, “Ан-Наср”, “Гуанжоу Эвергранд”, “Беневенто”, “Удинезе” ҳамда “Динамо Загреб” клубларида фаолият кўрсатган. Тройзе 2016 йилдан буён Фабио Каннавaро билан бир штабда ишлаб келмоқда — бу иккилик жамоа ичидаги уйғунлик ва тизимли иш услуби билан ажралиб туради.
Бугун Каннавaро бошчилигидаги миллий жамоа нафақат ўйин услубини, балки тайёргарлик маданиятини ҳам тубдан янгиламоқда. Италиялик мутахассислар тажрибаси ва профессионал ёндашуви орқали Ўзбекистон терма жамоаси халқаро майдонда рақобатбардош жамоага айланиш сари дадил қадам ташламоқда.
