“Реал”нинг ёш юлдузи Арда Гулер жорий мавсумдаги ҳолати, жамоадаги ўрни ва етакчи Килиан Мбаппе билан ўзаро тушунув ҳақида фикр билдирди. Шунингдек, у собиқ мураббий Карло Анчелотти ва жамоанинг ҳозирги бош устози Хаби Алонсо ҳақида ҳам гапирди.
Туркиялик 20 ёшли яримҳимоячи бу мавсум Ла Лигада 8 та ўйинда 3 та гол ва 3 та голли пас билан жамоа ҳужумининг муҳим фигураларидан бирига айланди. Унинг Мбаппе билан уйғун ҳаракатлари мутахассислар томонидан алоҳида эътироф этилмоқда.
— Мбаппе? У баъзан яримҳимояга ҳам тушади, лекин бу унинг ўйинни ҳис қилиш даражасининг юқорилигидан далолат. Унинг иқтидорига чек қўйиш керак эмас. Биз ўзаро майдонда жуда яхши тушунамиз, баъзан бир қарашнинг ўзи етарли, — деди Гулер француз ОАВга берган суҳбатида.
Арда Гулер, шунингдек, уларнинг ўйин услуби Криштиану Роналду ва Месут Ўзил тандемини эсга солаётганини эшитиб мамнунлигини билдирди, аммо катта натижага фақатгина икки эмас, балки бутун жамоа орқали эришиш мумкинлигини таъкидлади.
— Анчелотти — тарихдаги энг буюк мураббийлардан бири. У мен ҳақимда жуда илиқ фикр билдирганди ва бу менга катта куч берди, — деди у.
Ёш футболчи жамоага келганида скаут Жуни Калафат унга Европадаги ҳаётнинг илк йили осон кечмаслигини олдиндан айтганини ҳам эсга олди:
— Жуни менга биринчи йил оғир бўлишини тушунтирди. Бу табиий ҳолат — Туркиядан келган ёш ўйинчи учун Европанинг энг йирик клубига мослашиш вақт талаб қилади, — дея қўшимча қилди Гулер.
Ҳозирда у бош мураббий Хаби Алонсо раҳбарлигида ўзини анча эркин ҳис қилаётганини таъкидлади. Унинг фикрича, янги тизим унга ижодкорлик ва майдондаги қарор қабул қилишда катта имконият яратмоқда.
— Биз бир марта Чемпионлар лигасини ютдик, лекин бу мен учун етарли эмас. Мен яна титуллар, яна ғалабалар учун курашмоқчиман. Бу менинг “Реал”даги мақсадим, — дея сўзини якунлади Арда Гулер.
Шундай қилиб, туркиялик ёш юлдуз нафақат техник маҳорат, балки тафаккур ва амбицияси билан ҳам жамоада ўз ўрнини топаётганини кўрсатмоқда. “Реал”даги янги авлод ичида Гулернинг исми тобора баланд янграмоқда — у фақат ўйинчи эмас, келажак рамзига айланмоқда.
“Zamin”ни Telegram'да ўқинг!
