Жаҳон боксининг таниқли ва энг интизомли спортчиларидан бири — Александр Усик ўзининг келажакда сиёсатга қадам қўйиш нияти йўқлигини маълум қилди. Бу ҳақда украин боксчиси маҳаллий оммавий ахборот воситаларига берган интервьюсида сўз очди.
38 ёшли мутлақ жаҳон чемпиони шундай деди:
“Мен сиёсатга кириб нима қиламан? Менга бу керак эмас. Агар сиёсатчи ёки мэр бўлсам, кимга ҳам ёрдамим тегарди?! Мен бу соҳада ўқимаганман, юридик билимим йўқ. Сиёсатга кўп ҳолларда ўғирлашни истайдиганлар киради. Мен эса ўғирлик қилмоқчи эмасман. Худога шукур, менда барчаси бор. Буларни ўз меҳнатим билан топганман ва энди уларни бошқа йўналишда кўпайтиришни хоҳлайман,” — деди Усик.
Унинг сўзларига кўра, спорт орқали орттирган тажрибаси, интизоми ва меҳнати уни ҳаётда етарли даражада қондирмоқда. “Мен спорт орқали одамларга сабр, ишонч ва ҳаракат орқали ҳаммасига эришиш мумкинлигини кўрсатмоқчиман. Бу сиёсатдаги одамлардан кўра анча тўғри йўл”, — деди Усик.
Шу билан бирга, чемпион ўзининг асосий диққатини спортдан ташқари лойиҳаларга қаратмоқчи эканлигини ҳам билдирди. У жисмоний тайёргарлик марказларини очиш ва ёш боксчиларни қўллаб-қувватлаш орқали янги авлод спортчиларини тарбиялаш ниятида.
Боксчи сиёсатни “нўноқ ва ифлос ўйин” деб атади. Унинг фикрича, кўпчилик сиёсатга ҳокимият, пул ёки обрў учун киради, аммо у одамларга ҳақиқий фойда келтиришни хоҳламайди. “Мен ҳеч кимни танқид қилмоқчи эмасман, аммо ўзимни у дунёдан узоқроқ тутишни маъқул кўраман”, — деди у.
Эслатиб ўтамиз, Александр Усик 26 июль куни бўлиб ўтган катта бокс оқшомида Британиялик рақиби Даниэль Дюбуани бешинчи раундда нокаутга учратган эди. Бу ғалаба Усикнинг унвонларини яна бир бор мустаҳкамлади ва уни профессионал боксдаги энг муваффақиятли чемпионлардан бири сифатида тарихга киритди.
Мухлислар Усикнинг сўзларини самимий қабул қилишди. Кўпчилик унинг сиёсатдан узоқ туриш қарорини қўллаб-қувватлаб, “У ўзини эмас, халқни ўйлайдиган одам” деб таърифлади.
Ҳозирда Усик боксдан кейинги фаолиятини режалаштираётган бўлиб, у спортдаги номини тоза, обрўсини мустаҳкам сақлаб қолишни асосий мақсад деб ҳисоблайди.
“Zamin”ни Telegram'да ўқинг!
