Англия футболи афсонаси, “Манчестер Юнайтед”нинг собиқ юлдузи Пол Скоулз замонавий футболдаги энг маҳоратли ярим ҳимоячилар ҳақида фикр билдирди.
Скоулз тузган шахсий рейтингида биринчи ўринни “Барселона”нинг ёш истеъдоди Педри эгаллади. Англиялик афсона уни “ҳозирги замонда майдон марказидаги энг ақлли ва тиниқ фикрлайдиган футболчи” деб таърифлади.
«Педрини томоша қилиш мен учун завқ. У жуда ёш бўлишига қарамай, қарор қабул қилиш тезлиги ва пас маданияти билан ажралиб туради. Менинг севимли ўйинчим — aйнан у», — деди Скоулз.
Рейтингнинг иккинчи поғонасига “Манчестер Сити”нинг сардори ва жаҳон чемпиони Родри жой олди. Скоулз уни “замонавий ярим ҳимоянинг эталони” деб атади ва “у жамоанинг юраги, ўйинни бошқарадиган плеймейкер”, деб таъкидлади.
Шунингдек, афсона португалиялик Витинья (“ПСЖ”), аргентиналик Алексис Мак Аллистер (“Ливерпуль”) ҳамда нидерландиялик Френки де Йонг (“Барселона”)ни ҳам алоҳида эътироф этди. Уларнинг ҳар бири, Скоулзнинг фикрича, жамоавий ўйинни бошқариш ва босим остида аниқ қарор қабул қилиш қобилияти билан ажралиб туради.
Пол Скоулз таъкидлаганидек, “ҳозирги замонда марказий ярим ҳимоячи бўлиш нафақат жисмоний куч, балки интеллектуал фикрлаш, тезкор таҳлил ва ўйинни ҳис қилиш қобилиятини ҳам талаб қилади”.
Шундай қилиб, Скоулзнинг бу танлови ёш авлодга илҳом манбаи бўлди — у замонавий ярим ҳимоячини фақат техника эмас, балки ақл билан ўйнайдиган футболчи сифатида таърифлади.
“Zamin”ни Telegram'да ўқинг!
