Европа Чемпионлар лигаси гуруҳ босқичининг учинчи тур учрашувлари бошланмоқда. Қитъанинг энг нуфузли мусобақасида ўзбекистонлик футбол мухлисларининг кўпчилиги “Манчестер Сити”ни қўллаб-қувватламоқда — бунда жамоа ҳимоячиси Абдуқодир Ҳусановнинг иштироки катта омил бўлгани шубҳасиз.
Хосеп Гвардиола бошчилигидаги “шаҳарликлар” дастлабки икки турда “Наполи” устидан ишончли ғалаба қозонган ва “Монако” билан дуранг ўйнаган эди. Бу натижалардан кейин жамоа тўрт очко билан нимчорак финалга яқинлашиб, кучли саккизлик орасида бормоқда.
Энди “Манчестер Сити” Испания сафарида “Вильярреал”га қарши баҳс олиб боради. Бу ўйин Гвардиола жамоаси учун жиддий синов бўлиши кутиляпти. “Сити” август ойидан бери барча мусобақаларда мағлубиятсиз серияни сақлаб келмоқда ва уни янада узайтириш ниятида.
Мураббий учун Чемпионлар лигасида ғолиб чиқиш бу мавсумдаги асосий вазифалардан бири бўлиб қолмоқда.
Премьер-лиганинг охирги турида “Манчестер Сити” “Эвертон”ни Эрлинг Холанднинг дубли орқали 2:0 ҳисобида енгганди. Гвардиола ўша баҳсдан кейин норвегиялик ҳужумчи кўпроқ гол урмаганидан бироз афсусланганини ҳам айтган.
Шу билан бирга, Испания сафари олдидан жамоа сафидаги айрим футболчилар жароҳатдан соғайиб, таркибга қайтди. Улар орасида ҳимоячи Райан Айт-Нури ҳам бор. Бироқ “олтин тўп соҳиби” Родри Эрнандес ва ўзбекистонлик универсал ҳимоячи Абдуқодир Ҳусанов бу ўйинда жамоага ёрдам бера олмайди.
Гвардиола уларни “Вильярреал”га қарши баҳс рўйхатига киритмаганини тасдиқлади. Бу жамоа учун сезиларли йўқотиш бўлиши табиий.
“Сити” бу сафар 22 нафар футболчи билан Испанияга йўл олди. Таркиб қуйидагича шаклланган:
Дарвозабонлар: Жанлуижи Доннарумма, Жеймс Траффорд, Маркус Беттинелли.
Ҳимоячилар: Рико Льюис, Матэуш Нуньеш, Жон Стоунз, Рубен Диаш, Натан Аке, Йошко Гвардиол, Райан Айт-Нури, Нико О’Райли.
Ярим ҳимоячилар: Нико Гонсалес, Матео Ковачич, Тижани Рейндерс, Бернарду Силва, Фил Фоден, Райан Шерки.
Ҳужумчилар: Савиньо, Оскар Бобб, Эрлинг Холанд, Умар Мармуш, Жереми Доку.
Испаниянинг “Вильярреал” клуби ҳам бу баҳсга яхши формада кириб келмоқда. Улар Ла Лиганинг охирги турида “Бетис” билан 2:2 ҳисобида дуранг қайд этди ва жорий мавсумда “Реал” ҳамда “Барселона”дан кейин учинчи ўринда бормоқда.
Катта қизиқиш билан кутилган “Вильярреал” – “Манчестер Сити” учрашуви 21 октябрдан 22 октябрга ўтар кечаси, Тошкент вақти билан соат 00:00 да старт олади.
Бу баҳс Гвардиола жамоаси учун навбатдаги синов, “Вильярреал” учун эса ўз майдонида обрў учун кураш бўлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
