“Манчестер Сити” бош мураббийи Пеп Гвардиола жамоанинг ёш ярим ҳимоячиси Райан Шерки ҳақида мақтовли фикр билдирди, деб ёзди mancity.com.
Испаниялик мутахассиснинг таъкидлашича, Шерки жамоага қўшилгандан бери ўзининг катта иқтидори ва майдондаги техникаси билан ажралиб турибди.
«Райан Шерки — мен фаолиятимда кўрган энг иқтидорли футболчилардан бири. Техник жиҳатдан у ўз ўйинининг энг юқори босқичида. Ҳар сафар у тўпни қабул қилганда, вазият бизнинг фойдамизга ўзгаради. Энди у ўзини эркин ҳис қилади, аввалги босим йўқолган», — деди Гвардиола клуб расмий сайтига берган интервьюсида.
Маълумот учун, 22 ёшли франциялик ярим ҳимоячи Райан Шерки “Лион” таркибидан 2025 йил ёзида “Манчестер Сити”га 45 миллион евро эвазига кўчиб ўтган эди.
Жорий мавсумда у АПЛда 3 та баҳсда майдонга тушди ва ўз ҳисобига битта гол ёзиб қўйди. Мураббийлар штаби Шеркидан катта умидвор — Гвардиоланинг фикрича, у нафақат жамоа марказида, балки ҳужумдаги ижодий комбинацияларда ҳам асосий роль ўйнайди.
Таҳлилчилар эса Шеркини “Сити”нинг келажакдаги етакчиларидан бири сифатида кўрмоқда. Унинг услуби ва майдондаги тафаккури жамоанинг ўйинига янги динамика олиб келаётгани таъкидланмоқда.
“Zamin”ни Telegram'да ўқинг!
