Халқаро футбол федерацияси (ФИФА) 2026 йилги жаҳон чемпионати бошланишидан олдин офсайд қоидасини янгича таҳрирда қабул қилиш масаласини муҳокама қилмоқда, деб хабар берди Cardena SER.
Ҳозирги амалдаги тартибга кўра, ҳужумчи тўп узатилаётган пайтда унинг гол уриш мумкин бўлган танасининг исталган қисми охирги икки ҳимоячи (дарвозабон ҳам шулар жумласидан)дан олдинда бўлса, ўйиндан ташқари ҳолат қайд этилади.
Бироқ ФИФАда бу қоидани енгиллаштириш таклифи кўриб чиқилмоқда. Лондоннинг “Арсенал” клуби собиқ бош мураббийи ва ҳозирда ФИФАнинг глобал футболни ривожлантириш бўлими раҳбари Арсен Венгернинг таклифига кўра, агар ҳужумчи танасининг ҳеч бўлмаганда бир қисми охирги ҳимоячи чизиғида ёки ундан орқада бўлса, офсайд ҳисобланмайди.
Бу таклиф ҳозир Халқаро футбол ассоциациялари кенгаши (IFAB) томонидан ўрганилмоқда. Қоидани ўзгартириш масаласи бўйича овоз бериш 2026 йил 1 март куни ўтказилиши режалаштирилган.
2026 йилги жаҳон чемпионати 11 июндан 19 июлгача АҚШ, Мексика ва Канадада бўлиб ўтади. Мусобақада илк бор 48 та терма жамоа иштирок этади.
Мутасаддиларнинг фикрича, Венгер таклифи амалга оширилса, ҳужумкор футбол кучаяди ва баҳсли офсайд қарорлари сони анча камаяди.
