"Наполи" бош мураббийи Антонио Конте Чемпионлар Лигаси доирасида Нидерландиянинг ПСВ жамоасига қарши ўйиндан сўнг интервью берди. Учрашув 2:6 ҳисобида "Наполи" мағлубияти билан якунланди.
Учрашувда меҳмонлар ҳисобни очди, бироқ "ПСВ" биринчи бўлимда иккита гол урди. Иккинчи бўлим бошида эса нидерландияликлар учинчи голни киритди. 76-дақиқада "Наполи" бир футболчидан айрилди ва кейинги дақиқаларда яна учта гол ўтказиб юборди, ўзи эса бир бор жавоб қайтарди.
Антонио Конте натижадан норози эканини билдирди. У бундай мағлубият тасодифий эмаслигини таъкидлади.
Мураббий жамоа бу кечадан тўғри хулоса чиқариб, кучлироқ бўлиши зарурлигини айтди. Конте ўтган мавсумда "Наполи" чекланган таркиб билан Италия чемпионлигини қўлга киритганини эслатди.
У бу йил Чемпионлар Лигасида иштирок этаётганини, таркибда кўплаб янги футболчилар борлигини ва мавсум янада мураккаб бўлишини қайд этди. У жамоани олдинда оғир ўйинлар кутаётганини, Чемпионлар Лигасида рақобат даражаси жуда юқори эканини таъкидлади.
Ҳозирда "Наполи" умумий босқичда учта ўйиндан сўнг атиги уч очкога эга. Жамоа кейинги учрашувларда натижани яхшилашга ҳаракат қилади.
